DILI, 16 novembru 2023 (TATOLI)—Prezidente Parlamentu Nasionál (PPN), Maria Fernanda Lay, aprezenta kriasaun komisaun akompañamentu adezaun Timor-Leste (TL) ba ASEAN iha reuniaun líder bankada.
Notísia Relevante: PN fó prioridade diskusaun ba lejislasaun alínea ho roteiru rekerimentu ASEAN
“Ohin, ko’alia mós parte Parlamentu Nasionál sei kria komisaun akompañamentu adezaun ba Timor-Leste ba ASEAN. No, komisaun ne’e kompostu hosi membru na’in-hitu hosi kada bankada parlamentár sira-ne’ebé iha Parlamentu Nasionál,” Sekretária Meza PN, Deputada Virgínia Ana Belo, hateten ba jornalista sira hafoin ramata reuniaun líder bankada iha sala konferénsia PN, kinta ne’e.
Reuniaun líder bankada ne’e lidera direta hosi PPN hodi aprezenta ba líder bankada sira kona-ba atu kria komisaun ne’e.
Daudaun ne’e, Prezidente Parlamentu Nasionál (PPN) prepara hela lejislasaun atu kria komisaun ne’e, hafoin ne’e meza sei ajenda iha plenária hodi kria komisaun refere.
“Ida-ne’e, Prezidente Parlamentu Nasionál sei prepara ninia lejislasaun depois meza Prezidente mak sei halo entrega ba proponente mai hosi Deputadu sira sei aprezenta, agora bainhira ami seidauk tau ajenda, maibé bele semana oin ou semana tuir mai,” Deputada Virgínia hateten.
Komisaun ne’e ninia kna’ar hodi halo akompañamentu hamutuk ho Governu hodi haree pasu no TL presiza saida atu kompleta lejislasaun ruma mak PN bele hatene hodi bele avansa tanba tempu badak ona, se adezaun iha tinan 2025 signifika tenke halo preparasaun ho di’ak.
“Serbisu Governu mak sei hala’o, maibé Parlamentu tenke halo akompañamentu, hodi nune’e keta presiza lejislasaun ka lei ruma urjente ita bele halo kedas,” nia hateten.
Antes ne’e, Vise Ministra ba asuntu ASEAN, Milena Maria da Costa Rangel, informa Ministériu Negósiu Estranjeiru no Kooperasaun (MNEK) sei aprezenta inisiativa lejislativa ne’ebé alínea ho roteiru rekerimentu ASEAN ba iha Parlamentu Nasionál (PN) atu halo diskusaun no aprovasaun.
Nia hateten, Parlamentu Nasionál nia papel importante tebes iha prosesu TL nia adezaun no integrasaun rejionál ba ASEAN, hodi asegura interrese nasionál.
Prosesu integrasaun rejionál ba ASEAN rekere atu alínea ita nia polítika, lei no regulamentu sira haktuir akordu, konvensaun no instrumentu legál ASEAN nian, iha pilár ekonómiku, polítika no seguransa no mós sósiu kulturál.
“Parlamentu Nasionál nia papel hodi halo lei foun ou emenda lei existente ne’ebé kabe ba kompeténsia Parlamentu nian no ratifika akordu ka konvensaun importante hodi asegura ita-nia kompletu ho ASEAN nia rekerimentu ne’ebé hatur ona iha roteiru ita sai membru plenu,” nia dehan.
Iha tempu badak, MNEK hanesan ministériu ba susesu ba adezaun hamutuk liña ministériu sira ne’ebé hala’o serbisu ba pilár polítika-seguransa, ekonomia no sósiu kulturál sei atualiza planu asaun lejislativa ne’ebé sei alista ezbosu polítika, lei no tratadu no konvensaun internasionál sira-ne’ebé kabe ba kompeténsia Parlamentu Nasionál nian hodi aprova no ratifika.
Jornalista : Nelson de Sousa
Editór : Cancio Ximenes
