ReNAS ho FONTIL sensibiliza konseitu auditoria sosiál ba entidade Oé-Cusse
OÉ-CUSSE, 16 novembru 2023 (TATOLI) – Rede Nasionál Auditoria Sosiál (ReNAS) hamutuk ho Forum ONG Timor-Leste (FONTIL), kinta ne’e hala’o sensibilizasaun kona-bá konseitu auditoria sosiál ba entidade sira iha Rejiaun Administrativa Espesiál Oé-Cusse Ambeno (RAEOA).
Konsellu Fiskál FONTIL, Feliciano da Costa de Araújo, hateten, sensibilizasaun, ne’e atu hasa’e koñesimentu kona-bá lala’ok auditoria sosiál, hodi haforsa komunidade nia lian, promove transparánsia partisipasaun ne’ebé iguál, hodi garante akuntabilidade no inkluzivu iha prosesu dezenvolvimentu.
“Ami mai fahe informasaun liga ba iha situasaun munisipíu sira balu, ne’ebé halo ona auditoria sosiál, entaun hakarak fahe mós ba iha RAEOA, oinsa bele lori modelu no lala’ok ne’e atu implementa iha Oé-Cusse, ho nia objetivu bele hetan ideia seluk hosi komunidade Oé-Cusse, atubele kontinua implementa iha nível suku no aldeia, iha futuru komunidade sira implementa direita programa auditoria sosiál ne’e, no sai na’in ba programa auditoria sosiál ne’e rasik” Feliciano da Costa de Araújo, ko’alia iha otél Ambeno.
Notísia relevante: FONGTIL introdúz servisu auditoria sosiál ba Assanami
Atuál diretór Asosiasaun HAK ne’e, hateten, estabelesimentu ba iha auditoria sosiál maka oinsá atu avalia fila-fali ba ezekusaun Orsamentu Jerál Estadu (OJE) ba setór haat, edukasaun, saúde, infraestrutura bázika no setór agrikultura.
“Tanba kolokasaun orsamentu atu investe iha setór sira-ne’e, bele garante ninia transparánsia ho akuntabilidade ba iha prosesu ezekusaun,” nia afirma.
Sosiedade sivíl ne’e, argumenta, auditoria sosiál ne’e la’os kabe de’it ba instituisaun Governu, maibé envolve mós ba setór non-lukrutivu, sira-ne’ebé maka lahetan lukru, tama iha kategória atu halo auditoria sosiál.
“Auditoria sosiál ne’e hanesan mekanizmu ida ba diálogu entre Governante no komunidade sira, tantu feto, mane, joven, ema ho defisiénsia, ferik no katuas, no mós grupu minoria sira, hodi partisipa, monitoriza ba impelementasaun programa Governu nian,” nia katak.
Sekretáriu Rejionál ba Asuntu Komérsiu no Indústria, Pedro da Silva Boquifai, reprezenta Autoridade RAEOA, agradese ba prezensa organizasaun sosiedade sivíl iha RAEOA, tanba bele konvida entidade hotu atu hasa’e koñesimentu kona-bá kontrolu ezekusaun programa Governu nian.
“Ha’u reprezenta Autoridade RAEOA, agradese tanba auditoria sosiál la’ós akontese de’it ba Governante sira, parlamentu sira bainhira halo fiskalizasaun, maib’e ita rasik mós bele halo auditoria sosiál iha suku ba programa Governu nian ne’ebé emprezáriu sira hala’o, ne’ebé ha’u hanoin liuhsoi sensibilizasaun ita-bele hatene idak-idak nia kna’ar atu halo auditoria ne’e oinsá,” nia agradese.
Purtantu, hola parte iha sensibilizasaun ne’e mai hosi jestór sub-rejiaun haat, autoridade lokál, pontu fokál ministériu, Orgaunizasaun Naun Governamentál (ONG) rede referrál sira, grupu komunidade, ema ho defisiénsia, LGBTIQ+, veteranu, juventude no estudante sira.
Notísia relevante: Relatóriu Auditoria Sosiál hosi Sosiedade Sivíl iha Setór Importante Haat
Jornalista: Abílio Elo Nini
Editór: Evaristo Soares Martins
