DILI, 16 novembru 2023 (TATOLI) – Konstrusaun uma laku no reabilitasaun jardín Faról husi Seven Star Dini atinje ona 82,2%, tanba ne’e empreza esforsa atu finaliza lalais no entrega ba Governu.
Diretora Kompañia Seven Star Dini, Arina da Costa, garante katak obra rua ne’e possibilidade sei entrega ba Ministériu Obra Públika (MOP) no Sekretaria Estadu Arte no Kultura (SEAK), nu’udar nain ba projeitu, iha dezembru, antes natál.
“Ha’u esforsu, inísiu dezembru ne’e ita bele entrega kompletu ona knstrusaun uma laku no jardín ne’e ba Governu atu tama natál ne’e ita-nian komunidade sira bele uza ona fatin ne’e”, Arina da Costa ba Tatoli, iha jardín Faról, ohin.
Nia husu ba traballadór na’in-30 hamutuk ho enjeñeiru sira atu aselera obra ne’e hodi bele entrega ba donu projetu tuir promesa ne’ebé maka sira halo ona.
Haree husi progresu reabilitasaun ne’ebé la’o hanesan kanalizasaun bee-moos, montajen pavimentu no pinta muru sira konklui ona, falta de’it maka kuda ai-oan balun, kuda duut. Ba instalasaun trafo eletrisidade nian la’o hela no ba kontrusaun uma laku atinje ona 75%.
“Sei falta de’it tali metan maka sei iha hela prosesu nia laran. Bainhira tau hotu ona, ita bele dehan hatuur loloos ona orijinalidade uma laku tuir kultura nian. Kuandu item rua ne’e maka kompleta ona, ita bele dehan kontrusaun uma laku iha jardín Faról ne’e bele konklui ona”, esplika.
Daudaun ne’e, empreza presiza atu tan kuda ai-horis foun ne’ebé própriu duni ba jardín nian, nune’e bele prepara fali ba futuru bainhira ai-sira ne’e moris hotu ona bele aparu fali ai seluk ne’ebé moris iha jardín laran. Tanba ai sira ne’ebé agora moris iha jardín laran ne’e la kategoria ai-jardín nian.
“Ita agra hahú kuda ona Ai-Kameli, u, Ai Flamboyan no Ai Santa Filomena. Ai sira ne’e maka sei troka fali sira seluk karik ba futuru Governu hakarak aparu, bele husu lisensa ba diresaun ne’ebé kompetente”, salienta.
Rekorde katak empreza Seven Star Dini antes ne’e husu estende kontratu to’o janeiru 2024, tanba labele finaliza projetu tuir kalendáriu ne’ebé determina ona maka finaliza obra iha loron 01 fulan-agostu. Razaun labele finaliza iha tempu refere, tanba prosesu kee mate-ruin no harii koluna ba uma laku demora uitoan.
Serimónia ba konstrusaun uma laku no jardín Farol halo ona iha loron 06 fevereiru 2023. MOP no SEAK prevee osan hamutuk $422.653 ba obra ne’e.
Jardín ne’e ninia naruk kuaze metru 300 sei konstrui hosi área direitu umanu nian ba to’o iha rua Palapasu. Jardín ne’e rasik tuir Diresaun Jerál Abitasaun Urbanizmu nian seidauk iha naran espesífika ida, tanba ne’e mantein ho naran jardín Faról.
Uma laku ne’e rasik konsidera nu’udar fatin deskansa ba komunidade sira-ne’ebé mak hala’o viajen dook no la biban atu kontinua iha tempu ne’ebé termina, bele utiliza fatin ne’e hodi deskansa depois mak kontinua fali viajen. Konstrusaun uma laku ne’e pakote ida ho jardín Farol ne’ebé sei kompleta mós hariis-fatin no sintina públika.
Notísia relevante: Reabilitasaun jardín Farol labele finaliza tuir kontratu, empreza husu estende tan
Jornalista: Tomé Amado
Editora: Maria Auxiliadora
