DILI, 25 agostu 2023 (TATOLI) – Empreza Seven Star Dini ne’ebé hetan fiar husi Governu anteriór hodi konstrui Uma Laku no reabilita jardín Farol labele finaliza projetu tuir kalendáriu ne’ebé determina ona no husu estende kontratu to’o janeiru 2024.
Bazeia ba kontratu, reabilitasaun jardín no konstrusaun uma laku hahú hosi 01 fevereiru bainhira asina ona orden servisu entre Ministériu Obra Públika (MOP) no Seven Star Dini, ne’ebé mak termina iha loron 01 fulan-agostu. Maibé empreza admite katak labele finaliza iha tempu refere, tanba prosesu kee mate-ruin no harii koluna ba Uma Laku demora uitoan.
Ba kestaun ne’e, empreza halo ona enkontru ho na’in ba projetu sira mak Sekretaria Estadu Arte no Kultura (SEAK) no MOP hodi informa difikuldade sira ne’e no estende tan tempu ba fulan lima, entre setembru tinan ne’e no janeiru 2024, hodi bele finaliza projetu konstrusaun refere.
“Ho prosesu estensaun ne’e, na’in ba projetu konkorda ona no kompañia hatama ona pedidu ba aprovizinamentu. Seidauk iha asina kontratu estensaun ba faze daruak”, jestór ba projetu, Amorosio Gama, informa ba Tatoli.
Responsavel ne’e haktuir katak konstrusaun Uma Laku daudaun tama ona faze harii koluna no viga. Hafoin ida ne’e sei kontinua ba harii kakuluk. “Konstrusaun Uma Laku ne’e rasik tuir estimativa iha 5%, maibé daudaun ne’e foin tama 1%. Ne’ebé ami sei aselera iha tempu badak”, resposavel ne’e garante.
Tuir nia, prosesu konstrusaun ne’e demora tanba atu hetan ai-ruu hodi harii ba koluna ne’e kle’ur, tanba tenke koordena ho parte Agrikultura, liuliu Diresaun Floresta atu hetan lisensa hodi tesi ai, entaun kuaze fulan rua maka foin hetan rezultadu hodi bele bá tesi ai-ruu ne’e.
“Tanba ai ne’e la naran ema ida bele kuda. Ai-ne’e nia na’in maka Estadu, nune’e presiza iha koordenasaun atubele hetan lisensa. Agora Uma Laku ne’e konsege harii ona ninia koluna”, katak.
Ba konstrusaun jardín foin atinje 50%, tanba atu halo drenazen hetan fali mate-ruin hitu, entaun prejudika tiha prosesu konstrusaun sira. Mate-ruin hitu ne’ebé kompañia hetan ne’e, tolu iha área parte edifísiu Tatoli nia oin no haat iha Galeria Memória Viva nia oin.
“Ami tenke halo koordenasaun ho Forensik no parte Forensik presiza koordena ho Arte no Kultura, tanba arkeólogu mós haksumik-an hela iha SEAK nia mahon. Entaun, sira presiza halo peskiza no ida ne’e prejudika prosesu konstrusaun fízika iha terrenu”, esplika.
Ba kestaun mate-ruin ne’e entrega ona ba parte Forensik no agora kompañia kontinua nia serbisu konstrusaun no reabilitasaun jardín no harii ai-toos sira.
Lembra katak serimónia ba konstrusaun uma laku no jardín Farol halo ona iha loron 06 fevereiru 2023. MOP no SEAK prevee osan hamutuk $422.653 ba obra ne’e no empreza ezekuta ona rihun $200-resin.
Jardín ne’e ninia naruk kuaze metru 300 sei konstrui hosi área direitu umanu nian ba to’o iha rua Palapasu. Jardín ne’e rasik tuir Diresaun Jerál Abitasaun Urbanizmu nian seidauk iha naran espesífika ida, tanba ne’e mantein ho naran jardín Faról.
Uma laku ne’e rasik konsidera nu’udar fatin deskansa ba komunidade sira-ne’ebé mak hala’o viajen dook no la biban atu kontinua iha tempu ne’ebé termina, bele utiliza fatin ne’e hodi deskansa depois mak kontinua fali viajen. Konstrusaun uma laku ne’e pakote ida ho jardín Farol ne’ebé sei kompleta mós hariis-fatin no sintina públika.
Notísia relevante: Konstrusaun uma laku no reabilitasaun jardín Farol iha andamentu
Jornalista: Tomé Amado
Editora: Maria Auxiliadora
