DILI, 20 juñu 2023 (TATOLI) – Empreza Seven Star Dini kontinua halo konstrusaun ba uma laku no reabilitasaun jardín Farol, nune’e iha agostu mai sei finaliza obra hodi bele entrega ba Governu.
Reprezentante empreza, Nandinho Vieira da Costa, hatete badaen sira komesa halo ona sira-nian serbisu no iha semana ida ne’e sei harii riin uma laku nian.
“Badaen sira komesa lalin ona ai, hasai ona medida aliserse uma laku nia. Komesa chor ona hela de’it metade maka seidauk monta tanba hasoru difikuldade iha matebian Sérgio Vieira de Melo nia rezidénsia, tanba momentu ne’ebá forsa Nasaun Unida sira tau moru ida toos loos no halo kompañia nia hexa tolu maka avaria, maibé ami hasai ona no agora kontinua kee ona, lakle’ur tan bele chor hotu ona”, Nadinho Viera dehan ba Tatoli, iha Faról.
Nia salienta liga ba reabilitasaun jardín, badaen sira mós ke’e ona valeta, bainhira valeta sira ne’e hotu ona, empreza komesa serbisu iha jardín laran hodi kuda ai-horis sira ne’ebé prepara ona, halo kanalizasaun bee, instala lampu iha jardín inklui kuda mós ai-fuan sira, “tanba serbisu konstrusaun uma laku no reabilitasaun jardín Faról ne’e pakote ida de’it” afirma.
Nandinho Vieira kompromete katak empreza kumpre durasaun tempu ne’ebé Ministériu Obra Públika no Sekretaria Estadu Arte no Kultura fó ba sira no garante katak sei hatudu rezultadu ne’ebé di’ak.
“Ami sei hatudu responsabilidade boot ba obra ne’ebé Governu fó ona mai ami, sei aselera projetu ne’e molok fulan neen sei entrega ba Governu. Ami sei garante kualidade obra, nune’e bele hetan nafatin fiar hosi Governu”, realsa.
Rekorde katak serimónia ba konstrusaun uma laku no jardín Farol halo ona iha loron 06 fevereiru 2023. Ministériu Obra Públika no Sekretaria Estadu Arte no Kultura (SEAK) prevee ona orsamentu hamutuk $422.653 ba obra ne’e.
Empreza Seven Star Dini ho nia konsórsiu Quatro Colega mak hala’o obra ne’e tanba konsidera Quatro Colega iha ona esperiénsia hodi hala’o konstrusaun ba jardín, tanba halo ona projetu hanesan iha B.J Habibie.
Tuir kontratu, reabilitasaun jardín no konstrusaun uma laku hahú hosi 01 fevereiru bainhira asina ona orden servisu entre Ministériu Obra Públika no Seven Star Dini, ne’ebé sei termina iha loron 01 fulan-agostu.
Jardín ne’e ninia naruk kuaze metru 300 sei konstrui hosi área direitu umanu nian ba to’o iha rua Palapasu. Jardín ne’e rasik tuir Diresaun Jerál Abitasaun Urbanizmu nian seidauk iha naran espesífika ida, tanba ne’e mantein ho naran jardín Faról.
Uma laku ne’e rasik konsidera nu’udar fatin deskansa ba komunidade sira-ne’ebé mak hala’o viajen dook no la biban atu kontinua iha tempu ne’ebé termina, bele utiliza fatin ne’e hodi deskansa depois mak kontinua fali viajen. Konstrsaun uma laku ne’e pakote ida ho jardín Farol ne’e sei kompleta mós hariis-fatin no sintina públika.
Molok realiza obra ne’e, Governu halo uluk serimónia kulturál hodi husu lisensa ba rai-na’in no matebian sira atu bele fó dalan hodi garante prosesu konstrusaun no reabilitasaun, nune’e projetu ne’e bele la’o ho di’ak.
Notísia relevante: MOP-SEAK konstrui jardín-uma laku ho osan rihun $422-resin
Jornalista: Tomé Amado
Editora: Maria Auxiliadora
