DILI, 06 fevereiru 2023 (TATOLI)–Fokál Point Tékniku ba Planeamentu jardín hosi Dirasaun Jerál Urbanizmu Ministériu Obra Públika (MOP), Jezinho Carlos Henrique Maia da Silva, hateten MOP ho Sekretáriu Estadu Arte no Kultura (SEAK) prevee ona orsamentu hamutuk rihun $422.653 atu konstrui jardín no uma laku ida iha Faról.
“Ha’u hakarak dehan de’it katak na’in loloos ba projetu ida agora daudaun ne’e mak ami hosi dirasaun Jerál Abitasaun Urbanizmu ne’ebé reprezenta Ministériu obra Publika ne’ebé ho planu hakarak atu mellora jardín ida-ne’e hahú kedan iha tinan kotuk. Maibé área ida-ne’e pertensia mós ba Sekretáriu Estadu Arte no Kultura (SEAK) nian ne’ebé ligadu ho kultura sira, entaun MOP halo koordenasaun ho SEAK atu la’o hamutuk iha prosesu konstrusaun jardín no uma laku ne’ebé atu harii iha jardín Faról ne’e ho durasaun tempu durante fulan neen (6) nia laran,” nia Hateten ba Agência Tatoli hafoin ramata serimónia kulturál iha jardín Faról, segunda ne’e.
Nia dehan, iha parte balun ne’ebé ligadu ho kultura nian MOP entrega ba SEAK mak sei responsabiliza liu-liu kona ba uma laku ka fasilidade ne’ebé mak atu instala iha laran.
Tanba ne’e mak hahú ona serimónia kulturál ne’e hodi husu lisensa ba rai-na’in no matebian sira atu nune’e bele garante katak konstrusaun hahú daudaun ona.
Fokál point ba projetu ne’e informa katak kompañia ne’ebé sai manán-na’in hodi kaer projetu konstrusaun jardín no uma laku iha Faról ne’e, mak kompañia Seven Star Dini Unipesoál, Lda, maibé kompañia ne’e sei join venture ho Kompañia Quatru Kolega Unipesoál, Lda, tanba konsidera kompañia Quatru Kolega ne’e iha ona esperiénsia natoon hodi hala’o konstrusaun ba jardín sira inklui jardín Habibie ne’e rasik.
Prosesu konstrusaun ba Jardín no uma laku ne’e rasik tuir kontratu ne’ebé la’o hahú sura hosi loron 01 fevereiru bainhira asina ona orden do servisu entre Ministériu Obra Públika ho kompañia Seven Star Dini signifika konstrusaun ne’e hahú iha fevereiru sei termina iha loron 01 agostu 2023.
Jardín ne’e ninia naruk kuaze metru 300 sei konstrui hosi área direitu umanu nian ba to’o iha rua Palapasu, jardín ne’e rasik tuir dirasaun Jerál Abitasaun Urbanizmu nian seidauk iha naran espesífiku ida, tanba ne’e sira nafatin mantein ho naran jardín Faról.
Enjineiru iha Sekretáriu Arte no Kultura (SEAK), Lizandro Manuel, hateten projetu ne’e loloos obra públika nian maibé tanba área ne’e kabe ba SEAK nian entaun iha mós planu atu harii uma laku ida iha jardín Motaél ne’e.
Entaun, nia dehan, MOP konvida SEAK envolve iha prosesu ne’e, ne’ebé responsabilidade SEAK nian mak elabora de’it dezeñu depois entrega ba Obra Públiku sira tau hamutuk sai dokumentu ida hosi aprezenta ba Ajénsia Dezenvolvimentu Nasional hosi halo verifikasaun.
“Hosi ami-nia parte arte kultura nian mak ami aprezenta de’it mak dezeñu uma laku ho kustu estimativa ba uma laku ne’e de’it, depois mak Obra Públika mak enkaixa iha sira-nia dokumentu hotu,” nia dehan.
Uma Laku ne’e rasik konsidera nu’udar uma deskansa ba komunidade sira-ne’ebé mak hala’o viajen dook la biban atu kontinua sira-nia viajen iha tempu ne’ebé termina, bele utiliza fatin ne’e hodi deskansa depois mak sei kontinua fali sira-nia viajen.
Konstrusaun uma Laku ne’e pakote ida ho jardín Motaél ne’e no sei kompletu mós hariis fatin inklui sintina públiku.
Reprezentante Kompañia Seven Star Dini Unipesoál, Lda, Nandinho Vieira da Costa, hateten kompañia sei kumpre durasaun tempu ne’ebé Ministériu Obra Públika no Sekretáriu Estadu Arte no Kultura fó ona ba sira ho tempu konstrusaun ne’ebé termina ona, tanba ne’e kompañia garante katak sei hatudu rezultadu ne’ebé di’ak no sei garante ninia kualidade
“Ami sei hatudu responsabilidade boot ba obra ne’ebé Governu fó ona mai ami, ami sei garante sei aselera projetu ne’e molok fulan neen termina, ami sei entrega projetu ne’e ba Governu. Ne’eduni, ami sei servisu ho responsabilidade hodi kontrola ninia kualidade atu nune’e bele hetan nafatin fiar hosi Governu,” nia hateten.
Entretantu, serimónia ne’e rasik hetan partisipasaun hosi Diretór Jerál Arte no Kultura, Manuel Smith, Reprezentante Obra Públika, Reprezentante kompañia Seven Star Dini, reprezentante hosi uma lisan tolu hosi Leo-Besi, Leo-bai no Karketu Mota-Ain, nomós funsionáriu hosi Sekretáriu Estadu Arte no Kultura (SEAK)
Jornalista : Tomé Amado
Editór : Cancio Ximenes
