OÉ-CUSSE, 17 novembru 2023 (TATOLI) – Prezidente Komisaun Organizadóra ba komemorasaun loron proklamasaun 28 novembru 2023, Martinho Abani Elo, fó sai, atribuisaun kondekorasaun medalla ordén Nicolau Lobato ba kombatente na’in-182 iha RAEOA sei realiza iha loron 27 novembru 2023 ne’e.
Martinho Abani Elo, hateten, kondekorasaun ne’e nu’udar rekoñesimentu hosi Estadu Timor-Leste ba kontribuisaun luta libertasaun nasionál.
Notísia relevante:Kombatente 182 iha Oé-Cusse sei simu medalla orden Nicolau Lobato
Atuál Sekretáriu Rejionál ba Asuntu Administrasaun ne’e, informa, iha ámbitu enkontru preparasaun komemorasaun loron proklamasaun 28 novembru 2023, iha salaun administrasaun Numbei Oé-Cusse, sesta ne’e.
“Kondekorasaun ba kombatente libertasaun nasionál, sei hala’o iha loron 27 novembru 2023, sira hamutuk na’in-182, sei konsentradu hotu iha sub-rejiaun Pante Makasar,” Martinho Abani Elo, informa, iha ámbitu enkontru preparasaun ne’e.
Antes ne’e, Vice-Prezidente Konsellu Vetaranu Oé-Cusse, Xisto de Souza, ‘Boni-Bel’ hateten, atribuisaun kondekorasaun ba kombatente na’in-182 iha Oé-Cusse, mai hosi zona lima, Pante Makasar A no B, Oésilo, Pássabe no Nítibe.
Hosi kombatente sira na’in-182 ne’e maioria 8a14, aumenta tán ho martír na’in-hitu, válida ona hosi Ministériu Asuntu Kombatente Libertasaun Nasionál (MAKLN) ne’ebé rejista ona iha faze dahuluk 2003 no 2005.
Purantu, tuir dadus kombatente na’in-182 ne’e mai hosi zona lima, hanesan zona Pante Makasar A hamutuk na’in 37, zona Pante Makasar B na’in-35, zona Oésilo na’in-37, zona Pássabe na’in-36 no zona Nítibe na’in-37.
Notísia relevante: Konsellu Veteranu Oé-Cusse seidauk iha ossoario haloot restu mortál
Entretantu tuir livru 3-C, Orsamentu Jerál Estadu (OJE) 2023 RAEOA-ZEESM Timor-Leste, haktuir benefisiáriu ne’ebé hetan apoiu osan Estadu iha RAEOA ba kombatente ou veteranu libertasaun nasionál hamutuk ema na’in-363, no martires libertasaun nasionál hamutuk ema na’in-223.
Jornalista: Abílio Elo Nini
Editór: Evaristo Soares Martins
