Top

Parte kompetente presiza prosesa membru GAM-GAR ne’ebé komete krime

Membru PN hosi Bankada FRETILIN, Antoninho Bianco. Imajen/ Egas Cristovao

DILI, 17 novembru 2023 (TATOLI)—Deputadu hosi bankada FRETILIN iha Parlamentu Nasionál (PN), Antoninho Bianco, hateten maske IX Governu konstituisionál deside halo suspensaun ba atividade organizasaun Grupu Arte Marsiál (GAM) ho Grupu Arte Rituál, maibé parte kompetente presiza prosesa tuir lei ba membru GAM-GAR ne’ebé komete krime.

Notísia Relevante: Komisaun B husu KRAM suspende GAM-GAR la kontribui ba estabilidade

“Suspensaun kuaze ba oin atu taka, maibé ami dehan krime ne’e la’ós organizasaun nian tanba ema individuál mak halo. Se mak komete krime la sees hosi regra, prosesa tuir regra ne’ebé iha,” nia hateten ba jornalista sira iha uma fukum PN, sesta ne’e.

Agora daudaun Governu sente katak sira hakarak suspensaun tomak, buat ida akontesimentu ne’e iha fatin ida no tuir loloos prosesu ne’e fazeada iha parte ne’ebé akontese, ezemplu, iha Dili aplika suspensaun fatin ne’e.

Tuir loloos aplika suspensaun ba iha fatin ne’ebé iha, maibé agora iha desizaun polítika bele rezolve buat hotu, agora suspensaun pur dekretu lei, agora iha arte marsiál ho lei.

“Suspensaun la’o ona maibé krime ne’e ita haree ema ida ka rua mak komete, ida-ne’ebé grave asaun sira kontra lei ne’e mak merese hetan kondenasaun. Ne’ebé, ba ami-nia pozisaun, sé de’it mak komete krime ne’e tenke kumpre regra. Entaun, instituisaun sira-ne’ebé kompetente bele ka’er ema-ne’e prosesa tuir regra ne’ebé iha ba kastigu,” nia hateten.

Desizaun polítika dehan suspende ne’e buat ida, agora ida seluk prosesu krime ba ema ne’e, iha buat rua, no tuir lei mós bele halo suspensaun ba ranting ne’ebé la kumpre lei.

Deputadu CNRT, Natalino dos Santos, hateten Governu iha kompeténsia tomak atu halo suspensaun ba atividade GAM-GAR, maibé nia nafatin husu atu kontribui ba pás no estabilidade iha rai-laran.

Tuir rezolusaun Governu númeru 45 /2023, 10 novembru, determina suspensaun kona-ba ensinu, aprendizajen no prátika arte marsiál ho adosaun medida hodi asegura orden públika.

Konsidera insidente todan boot sira-ne’ebé rejista iha loron hira nia laran, foin daudaun ne’e, no iha fatin keta-ketak iha territóriu nasionál ne’ebé envolve elementu sira-ne’ebé pertense ba grupu arte marsiál.

Ida-ne’e konsidera, hosi total inisidente 54 ne’ebé rejista, ema sira-ne’ebé mate hamutuk na’in-haat (4) no kanek todan na’in-26 ho tan danu ka estragu ba sasán hanesan uma 21 no veíkulu (kareta no motor) 10.

Eventu sira hanesan ne’e provoka iha komunidade ne’ebé afetada sentimentu hanesan insegurasa no ida-ne’e hanesan ameasa ne’ebé boot ba estabilidade no seguransa públika iha nasaun.

Tuir Lei númeru 5/2017, 19 abril, prevee ona katak ensinu, aprendizajem ho prátika arte marsiál no loke sentru, klubu ka eskola hodi prátika atividade hirak ne’e depende ba autorizazaun prévia.

Nune’e, determina suspensaun kona-ba ensinu, aprendizajen ho prátika arte marsiál no prátika arte rituál iha territóriu nasionál tomak, ba períodu fulan neen.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!