Komisaun B husu KRAM suspende GAM-GAR la kontribui ba estabilidade
DILI, 25 agostu 2023 (TATOLI)—Prezidente Komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Deputadu Domingos Augosto ‘Deker’, husu ba Komisaun Reguladora Arte Marsiál (KRAM) atu suspende atividade organizasaun arte marsiál no rituál ne’ebé nia membru sira kontinua kria konflitu la kontribui ba estabilidade iha rai-laran.
Notísia Relevante: Deputadu KHUNTO husu KRAM fó sansaun ba membru organizasaun arte marsiál
Nu’udar reprezentante povu, nia hatutan, komisaun B preokupa tanba ne’e rekomenda ba Ministeriu Interiór no komandu PNTL oinsá ka’er lei hodi ezije nafatin responsabilidade ba líder organizasaun no Grupu Arte Marsiál (GAM) no Grupu Arte Rituál (GAE) sira iha Tirmor-Leste.
“Ami husu nafatin ba KRAM hanesan organizasaun ne’ebé hetan konfiansa hosi Estadu no Governu hodi fó mahon ba arte marsiál no arte rituál sira, ka’er metin lei hodi ezije responsabilidade arte marsiál no arte rituál sira-nia líder sira atu eduka sira-nia ema hodi kolabora no kontribui ba estabilidade, atu kria pás no hakmatek ba povu sirkula buka sira-nia moris. Se lakohi kolabora di’ak-liu desizaun ikus suspende,” Prezidente Komisaun B ne’e hateten ba jornalista sira iha uma fukun PN, sesta ne’e.
Nia preokupa ho situasaun seguransa rai-laran liuliu iha kapitál Dili tanba iha tempu kalan sirkulasaun komunidade sente la seguru, tanba mosu provokasaun no tuda malu hosi membru arte marsiál no rituál sira, tanba ne’e líder organizasaun arte marsiál sira tenke kontrola ninia membru sira.
“Responsabilidade individual, loos. Maibé, indivídu ne’ebé mak nia envolve aan iha organizasaun ida, líder organizasaun ida iha dever no morál atu regula ninia ema. Lei garante liberdade kualkér sidadaun atu kria organizasaun durante organizasaun ne’e iha vizaun no misaun di’ak ba rai no povu ida ne’e, bele de’it. Maibé, líder sira tenke hatudu sira-nia responsabilidade la’ós kria de’it hodi la eduka, ne’e labele,” nia hateten.
Prezidente Komisaun B ne’e hateten, iha demokrásia fó ba ema buat rua direitu no dever, tanba ne’e sidadaun hotu hakruuk ba lei no iha papel importante atu kontribui ba estabilidade no pás iha rai-laran, hodi fó oportunidade ba IX Governu KOnstitusionál ne’ebé foin mak lori Orsamentu Retifikativu mai iha PN no hetan ona aprovasaun iha final globál hodi lori dezenvolvimentu ba nasaun.
Notísia Relevante: KRAM enkoraja GAM-GAR kumpre lei nú. 5/2017, Sansaun: Hein investigasaun ramata
Jornalista : Nelson de Sousa
Editór : Cancio Ximenes
