COVALIMA, 17 novembru 2023 (TATOLI)—Servisu Saúde munisípiu Covalima rejista pasiente ho moras malária hamutuk na’in-sia hosi suku Lalawa ho beiseuk, postu administrativu Tilomar, munisípiu Covalima, durante fulan-jullu to’o outubru tinan ne’e.
“Ami-nia pesoál saúde analista halo konsulta hodi hetan pasiente ho moras malária. Pesoál saúde konsidera moras ne’e importadu tanba iha sidadaun indonéziu na’in-20 resin mak hela iha aldeia Ai-oan durante semana-ida bainhira mai haloot mate-isin iha postu Tilomar, hafoin komunidade hetan moras malária,” Diretora Servisu Saúde munisípiu Covalima, Maria Fátima Moniz, informa ba Agência Tatoli, iha ninia knaar fatin, Ladi , sesta ne’e.
Pasiente rejistadu kompostu hosi iha fulan-jullu ida, agostu lima, setembru ida, outubru rua, nune’e pesoál saúde fó tratamentu ba pasiente sira.
“Hafoin halo tratamentu ba pasiente, pesoál saúde hanoin atu halo prevensaun susuk ne’ebé moris iha aldeia Ai-oan no rega ai-moruk hodi hamate susuk nune’e labele hadaet moras ba ema seluk,” nia akresenta.
Notísia relevante : Moras malária iha Timor-Leste hahú tama ba faze eleminasaun
Pesoál saúde uza termu 2510 atu halo prevensaun ba moras malária, ne’ebé númeru 2 signifika durante loron-rua pesoál saúde halo entrevista ho komunidade, númeru 5 halo screening hasai ran masál hodi halo teste iha área afetadu moras malária, hahú hosi pasiente nia uma to’o kilómetru ida resin no númeru 10 signifika iha loron 10 halo prevensaun rega susuk.
“Durante pesoál saúde sira rega susuk , iha uma-kain-49 lakohi koopera ho ekipa hodi rega iha sira-nia uma. Entaun, pesoál sira koopera ho autoridade lokál no ikus mai rega duni iha sira-nia hela fatin ho aimoruk hodi hamate susuk,” Diretora relata.
Aleinde ne’e, pesoál saúde kontinua halo screening teste ran masál iha suku viziñu ho suku Lalawa ho Beiseuk hanesan komunidade iha suku Maudemo na’in-200 resin, maibé nia rezultadu teste la identifika komunidade moras malária.
Pesoál Saúde ne’ebé servisu iha postu administrativu Tilomar hamutuk-44, kompostu hosi Sentru Saúde Tilomar 27 Postu Saúde Foho Lulik na’in-lima, Postu Saúde Lalawa na’in-haat no Postu Saúde Wetaba na’in-ualu.
Jornalista : Celestina Teles
Editora : Julia Chatarina
