JAKARTA, 18 novembru 2023 (TATOLI)—Ministru Defeza, Donaciano Costa Gomes ‘Pedro Klamar Fuik, hala’o enkontru bilatarál ho nia ómologu Ministru Defeza Laos, Jenderál Chansamone Chanyalath, sábadu ne’e, hodi koalia kona-ba asuntu tékniku.
Enkontru Ministru Defeza ASEAN no enkontru Ministru Defeza ASEAN plus iha tinan oin sei realiza iha Laos, tanba ne’e Ministru Pedro hakarak aprosima hodi bele partisipa ativu iha eventu internasionál.
“Tanba ne’e ita husu sira atu ita bele prepara-an di’ak liután ho ativu liután bainhira partisipa iha fórum ASEAN nian iha tinan oin,” Ministru hateten hafoin hala’o reniaun bilaterál ho Ministru Defeza Laos, iha sala reuniaun Sentru Konvensaun Jakarta.
Notísia relevante : MD sei aprezenta kestaun rua iha Reuniaun Ministru Defeza ASEAN iha Jakarta
Ministru rekoñese, ladún partisipa ativu tanba Timor-Leste nu’udar nasaun ho estatutu observadór ne’ebé foin ba dahuluk partisipa enkotru ne’e.
Aleinde ne’e, enkontru entre parte rua bele partilla informasaun ba malu kona-ba kestaun téknika sira iha fórum ASEAN ne’ebé sei hala’o iha Laos, nune’e bele ajuda Timor-Leste kria kondisaun ruma hodi prepara-an partisipa ho di’ak iha reuniaun altu nível tuir mai.
“Ita halo aprosimasaun ida ho Laos para ita haree téknikamente ita presiza saida ho Laos atubele inisia sira-nia Prezidénsia ASEAN, ida-ne’e mak ita ko’alia ho sira para sira mós prepara hodi bele oferese kondisaun nune’e Timor-Leste bele hasoru eventu ASEAN ho di’ak,” nia tenik.
Jornalista : Natalino Costa
Editora : Julia Chatarina
