VIQUEQUE, 18 novembru 2023 (TATOLI) – Koordenadór Sentru Informasaun Suku (SIS), Nahareca Gilberto Anjelino Alves, husu ba Sekretariu Estadu Komunikasaun Sosiál (SEKOMS) atu kria formasaun jornalizmu ba sira atu bele rekolla informasaun iha Suku Nahareca hodi bele hakerek informasaun ho di’ak hodi públika iha sira nia pájina facebook, (Sentru Informasaun Nahareca) atu ema hotu bele asesu kada loron kona-ba situasaun suku refere nian.“Sentru Informasaun Suku ne’e inaugura ona, maibé ami sei menus koñesimentu kona-ba oinsa mak buka informasaun no hakerek notísia atu públika, ami mós sei menus koñesimentu kona-ba utiliza kamera no komputadór, ne’ebé ami husu ba SEKOMS atu bele fó formasaun mai ami”, Gilberto dehan ba Agência TATOLI iha Nahareca, sesta ne’e.
Aleinde ne’e, nia husu mós Governu atu aumenta tan ekipamentu hanesan laptop, kamera, audiu-recod atu bele fasilita di’aik liután servisu ho másimu.
“Ami presiza aumenta tan ekipamentu, agora Governu fó hela ekipamentu balu mai ami hanesan, komputadór ida, kamera Canon ida no laptop ida, agora ami ne’ebé servisu iha Sentru Informasaun ne’e hamutuk ema 15, entaun ekipamentu hirak ne’e lá to’o, presiza aumenta tan”, nia husu.
Nune’e mós, SIS Nahareka susar atu asesu ba liña internet tanba ne’e difikulta tebes sira hodi hala’o servisu iha sentru hodi publika sai informasaun atuál iha Suku Nahareca.
“Ami-nia problema ida mak liña internet iha ne’e susar la halimar, ami husu ba Governu sé bele rezolve mós liña internet iha Nahareca atu nune’e ami hala’o servisu ho másimu no lais”, nia hatete.
SIS ne’e instala mós liña internet hanesan Wi-Fi, maibé liña internet mak la’o ladún di’ak.
Hatan ba preokupasaun hirak ne’e, SEKOMS Expedito Dias Ximenes hatete, SEKOMS iha diresaun ida mak Sentru Formasaun Tékniku Komunikasaun (SFTEK) ne’ebé sei fó formasaun ba joven hirak ne’ebé servisu iha SIS Nahareca.
“Ita iha diresaun ida bolu naran CEFTEC, ne’ebé ita-boot sira na’in hira bele ba tuir formasaun, iha CEFTEC fó formasaun ba impresna jornalista sira, fó mós formasaun audivizuál ba editór no operadór kamera sira, ne’ebé ha’u sei ko’alia ho Diretor CEFTEC atu haree sira mak mai atu fó formasaun ba ita-boot sira ka ita-boot sira mak ba tuir iha Dili”, nia adianta.
Nia dehan, SIS importante tebes ba komuniade no inan aman sira iha área rurál atu asesu ba informasaun tanba mundu agora dijitalizasaun no ema hotu utiliza facebook ho nune’e SIS dalan di’ak atu lori informasaun besik liubá komunidade.
Enkuantu kona-ba liña internet ne’ebé ladun di’ak no estrada ne’ebé sai preokupasaun boot iha Nahareka, SEKOMS sei informa ba Primeiru-Ministru Kay Rala Xanana Gusmão, nune’e bele rezolve.
Notísia relevante : SEKOMS inaugura Sentru Informasaun Suku iha Nahareca
Jornalista: Hortencio Sanchez
Editór : Zezito Silva
