Empreza Tsuneishi-PM Xanana diskute planu instalasaun estaleiru iha Manatuto
DILI, 20 novembru 2023 (TATOLI)—Empreza Tsuneishi Shipbuilding akompañadu hosi Embaixadór Japaun iha Timor-Leste, Tetsuya Kimura, segunda ne’e, hasoru no hala’o enkontru ho Primeiru-Ministru, Kay Rala Xanana Gusmão, hodi diskute planu instalasaun estaleiru iha Manatuto.
Notísia Relevante: Empreza Japaun planeia harii estaleiru iha Manatuto
“Embaixadór mai ho kompañia hosi Japaun sira hakarak loke fatin ida atu halo ró ne’ebé boot no oioin, ne’ebé sira buka hela fatin. Sira haree ona fatin rua ka tolu maiibé sira sei haree didi’ak rai ne’e sei tahan ka lae? Tasi kle’an oinsa? Sira sei ba halo tan estudu no hare’e didi’ak, hafoin ko’alia ho Governu hodi fó lisensa ba sira hodi halo fábrika ba halo ró. Sira haree ida iha Mantuto Villa, no ida iha Laleia no ida ne’e hanesan fatin de’it. Sira sei ba hasai rai hodi haree no haree tasi nia kle’an mak foin deside,” Xefe Governu hateten iha gabinte fronteira marítima, Palásiu Governu, segunda ne’e.
Embaixadór Japaun iha Timor-Leste, Tetsuya Kimura, hateten nia parte mai ho reprezentante kompañia naran Tsuneishi hosi fatin ida besik Hiroshima iha Japaun atu haree estaleiru. Sira mai ona iha fulan-agostu 2023 -ne’e hodi haree fatin sira merese atu halo investimentu ba estaleiru.
“Ohin, hasoru PM atu troka opiniaun no fó informasaun ikus nian kona-ba saida mak sira hetan ona iha fatin ne’ebé sira hili. Sira mós husu apoiu Governu ba sira-nia investimentu no sira sei halo estudu viabilidade kona-ba planu ne’e. Sira husu Governu atu fo lisensa ba planu investimentu ida-ne’e,” nia dehan.
Daudaun ne’e halo hela estudu viabilidade, maibé iha futuru kompañia mak sei deside atu hatama traballadór timoroan ka lae hodi bele servisu iha futuru.
“Iha momentu ne’e, ami labele hatete bainhira mak ramata halo estudu viabildade no sira rasik sei halo survey depois mak deside,” nia hateten.
Antes ne’e, ihaloron 6 setembru 2023, Embaixadór Japaun mai Timor-Leste ho reprezeentante kompañia Tsuneishi Shipbuilding hosi Japaun hala’o ona enkontru ho TradeInvest atu fasilita kompañia nia interrese mai Timor-Leste hodi haree oportunidade atu investe iha área shipbuilding (estaleiru) hodi harii indústria shipyard iha área hamutuk 970 km2 iha Manatuto.
Nune’e, iha 8 setembru 2023, TradeInvest rasik akompaña Empreza Tsuneishi Shipbuilding C. Ltd hosi Japaun hodi hala’o observasaun ba lokalizasaun indústria estaleiru hosi Empreza Tsuneishi Shipbuilding C. Ltd iha munisípiu Manatuto.
Iha biban ne’e, ekipa tékniku sira hala’o observasaun ba área idenfikadu lima (5) ne’ebé lokaliza iha Manatuto. Hosi rezultadu observasaun ne’e ekipa tékniku sira identifika prelemináriu iha área postu administrativu Laleia no área Sau iha postu administrativu Manatuto villa.
Entre parsela rai rua (2) ne’ebé lokaliza iha área postu administrativu Laleia no área Sau iha postu administrativu Manatuto Villa, depende ba desizaun hosi empreza hodi deside no hato’o pedidu ba Ministériu Justisa atu bele hahú nia prosesu administrasaun.
Tuir planu, investimentu privadu ne’e sei oferese kampu traballu mínimu 4.000 ba timoroan no sei prodús ró (vessel) hamutuk 10-12 kada tinan no sei harii eskola, hotel no ospitál iha área refere.
Kompañia Tsuneishi Shipbuilding ne’e rasik investe ona iha nasaun seluk hanesan Filipina, Xina no iha Japaun rasik.
Jornalista : Osória Marques
Editor : Cancio Ximenes
