Empreza Japaun planeia harii estaleiru iha Manatuto
DILI, 07 setembru 2023 (TATOLI)—Embaixadór Japaun iha Timor-Leste, Tetsuya Kimura, hamutuk ho reprezentante empreza Tsuneishi Shipbuilding, kinta ne’e, hasoru malu ho Diretór Ezekutivu Interinu TradeInvest Timor-Leste, Decio Ribeiro Sarmento, akompaña hosi Diretór Promosaun Investimentu Ezaquiel Babo, hodi ko’alia kona-ba investimentu iha indústria marrítima.
“Objetivu enkontru ne’e atu fasilita empreza nia interese mai Timor-Leste hodi haree oportunidade atu investe iha área konstrusaun navál (shipbuilding) hodi harii indústria shipyard (estaleiru) iha área hamutuk 970 km2 iha munisípiu Manatuto,” refere nota ne’ebé Agência Tatoli asesu.
Notísia relevante : Orsamentu 2024, Governu sei prevé milliaun $5 kontrui ró peska rua
Tuir planu, investimentu privadu ne’e sei oferese postu traballu mínimu 4.000 ba timor-oan no sei prodús ró hamutuk 10-12 kada tinan inklui sei harii eskola, otél no ospitál iha área refere.
Empreza Tsuneishi Shipbuilding ne’e rasik investe ona iha nasaun seluk hanesan Filipina, Xina no iha Japaun rasik.
Biban ne’e, Diretór Ezekutivu Interinu fahe informasun kona-ba benefísiu insentivu ne’ebé Governu oferese nomós esplika kona-ba prosesu hodi aplika ba deklarasaun benefísiu ka akordu espesiál investimentu ne’ebé hatuur ona iha Lei Investimentu Privadu númeru 15/2017.
Enkuantu, Governu liuhosi TradeInvest Timor-Leste sei fó apoia no fasilita empreza hosi Japaun ne’e hodi konkretiza investimentu privadu ne’ebé sei fó benefísiu boot ba kresimentu ekonomia Timor-Leste.
Iha sorin seluk, Embaixadór Timor-Leste iha Japaun, Elídio Ximenes da Costa, hateten, nia halo ona negosiasaun ho empreza antes ne’e.
“Ida-ne’e mak loke duni, bele fó vantajen boot tanba loke postu traballu ba joven sira. Ne’ebé ró ahi la presiza ba hadi’a ona iha Indonézia. Investimentu ne’e di’ak tanba halo ró kaer ikan,” Diplomata timor-oan ne’e tenik.
Nia konsidera, investimentu ne’e bele fó tulun boot ba projetu dekarbonizasaun ne’ebé Autoridade Nasionál Petróleu no Minerál atu halo iha Timor-Leste.
Jornalista : Antónia Gusmão
Editora : Julia Chatarina
