OÉ-CUSSE, 20 novembru 2023 (TATOLI) – Kuda hitu hosi Rejiaun Administrativa Espesiál Oé-Cusse Ambeno (RAEOA), daudaun ne’e prepara hodi dezloka ba distritu Timur Tengah Utara (TTU) hodi partisipa iha eventu piala Bupati TTU ba dala-19 iha provínsia Nusa Tenggara Timur (NTT), Repúblika Indonézia.
Notísia relevante: Aniversáriu sidade Kefamenanu, nu’udar opurtunidade hametin kooperasaun entre RAEOA-TTU
Prezidente Assosiasaun Kurrida Cavalo Oé-Cusse Ambeno (AKKOA, sigla portugés), Mario Muni Salu, hateten, kompetisaun desportu tradisionál ne’e sei realiza iha kampaun kuda halai taru iha Tanjung-Bastiang Wini, sub-rejiaun Insana Súl.
“Foin daudaun ita hetan konvite hosi komisaun organizadora Dinas Parawisata no Ekonómia Kreatif TTU, atu partisipa kompetisaun kuda halai taru ba eventu piala Bupati TTU nian ba dala-19, iha Wini,” Mario Muni, ko’alia iha Oé-Cusse, segunda ne’e.
Prezidente Asosiasaun ne’e, informa, preparasaun ne’ebé halo, primeiru hafoin simu konvite, kontinua halo kedas koordenasaun ho autoridade TTU atu-bele hasai karta lisensa deliberasaun animál kuda halai taru ba Indonézia liu-liu iha Dinas Peternatakan Kupang nian.
“Depois ami hetan aprovasaun no fó duni karta ne’e mai ami, atu-bele lori kuda sira liuhosi fronteira, depois ami koordena mos Autoridade RAEOA liuhosi Sekretáriu Rejionál Asuntu Agrikultura, no Karantina, husu atu hasai karta lisensa ba kuda sira bele sai liur hodi kompete,” nia informa.
“Bainhira dokumentu legál sira kompleta, ami hahú identifika kuda na’in-sira iha Oé-Cusse, tan ne’e maka ita identifika kuda hitu, ne’ebé potensiál atu-bele partisipa iha kompetisaun Piala Bupati TTU,” nia katak.
Entretantu, kuda hitu sira-ne’e, Assosiasaun Kurido Cavalo Oé-Cusse Ambeno, sei deskloka iha loron tersa (21/11/2023), maka hanesan, iha sub-rejiaun Pante Makasar kuda inan ho naran Leosa’e Feotmese Lifau hosi suku Costa, kuda Anin Salu Mata hosi suku Naimeko, no kuda Sky Meo-Ana Padimau hosi suku Costa.
Nune’e mós hosi suku Abani, sub-rejiaun Pássabe hanesan, kuda aman Tonyo Falo, kuda inan ho naran Gadis Lifau hosi suku Abani, no kuda Naobtuan.
Notísia relevante:Delegasaun RAEOA vizita atendimentu suku ho sistema dijitalizasaun iha suku Tapenpah TTU
Jornalista: Abílio Elo Nini
Editór: Evaristo Soares Martins
