DILI, 20 novembru 2023 (TATOLI) – Ministériu Edukasaun (ME) no Komisaun Funsaun Públika (KFP) halo ona verifikasaun, faze dahuluk, ba dadus profesór kontratadu 5.009 ne’ebé atu tama ba rejime espesiál.
Diretora Nasionál Rekursu Umanu ME, Anita de Jesus, afirma katak, dadaun ne’e, ekipa husi ME ho KFP halo hela sira-nian serbisu hodi verifika dadus profesór no prosesu ida ne’e konsidera inísiu hodi hein públikasaun iha Jornál Repúblika.
“Ekipa rua halo ona prosesu verifikasaun, kuandu loos hotu ona maka sei públika iha Jornal Repúblika”, Anita de Jesus reitera ba Tatoli iha Vila Verde, ohin.
Dirijente ne’e dehan verifikasaun ne’ebé tama ona iha faze dahuluk ne’e sei remata tuir tempu ne’ebé determina ona iha dezembru no hafoin hetan tiha rekomendasaun husi KFP hodi públika tiha maka kontinua fali faze daruak.
Anita de Jesus informa tan katak dadús profesór kontratadu faze daruak nian la barak, maibe presiza halo nafatin verifikasaun atu hatene ho didi’ak manorin ida ne’ebé mak atu hetan direitu ba ingresu espesiál ne’e kumpre duni kritériu sira ne’ebé ME fó sai ona ka la’e, nune’e ba futuru labele hamosu fali dezentendimentu.
Notísia relevante: ME: Sei laiha ingresu automátiku ba profesór kontratadu 2023
Jornalista: Tomé Amado
Editora: Maria Auxiliadora
