COVALIMA, 20 novembru 2023 (TATOLI) – Ministériu Solidariedade Sosiál no Inkluzaun (MSSI) Covalima halo ona pagamentu ba benefisiáriu Bolsa da Mãe Kondisionál hamutuk 3.212.
“Ita halo pagamentu ba benefisiáriu husi postu administrativu hitu hamutuk nain-3.212”, Pontu Fokál Bolsa da Mãe Kondisionál Covalima, Nelson de Jesus, relata dadus ne’e ba Tatoli, iha Suai Loro, ohin.
Pagamentu Bolsa da Mãe refere ba labarik tinan ida kada fulan simu $5 no ba tinan ida hetan $60.
Montante osan ba bolsa ne’e hamutuk $325.140 ba benefisiáriu 3.212 husi postu administrativu Fatululik iha 133 (totál osan $13.620), Fatumea 221 (orsamentu $20.100), Fohorem 175 (orsamentu $19.200), Maucatar 500 (orsamentu $51.660), Suai 868 (verba $75.180), Tilomar 400 (orsamentu $42.660) no Zumalai 915 (verba $102.720).
Oráriu pagamentu ba benefisiáriu hahú iha loron 16 novembru iha postu Maucatar no Suai. Loron 17 iha postu administrativu Tilomar, Maucatar no Fatululik, loron 18 iha Fohorem no Fatumea no loron 20-21 iha Zumalai.
Totál benefisiáriu ba programa Bolsa da Mãe Kondisionál iha territóriu hamutuk 76.094 ho nia alokasaun orsamentu millaun $4,6.
Notísia relevante: “Pagamentu Bolsa da Mãe Kondisionál sei konklui iha 20 dezembru”
Jornalista: Celestina Teles
Editora: Maria Auxiliadora
