iklan

POLÍTIKA

PN aprova alterasaun lei kriasaun RAEOA-ZEESM iha finál globál

PN aprova alterasaun lei kriasaun RAEOA-ZEESM iha finál globál

Parlamentu Nasionál (PN), liuhosi reuniaun plenária aprova proposta-lei númeru 2/VI/1a, alterasaun datoluk lei númeru 3/2014, 18 juñu, ne’ebé kria RAEOA no estabelese ZESSM no Ataúro iha finál globál ho votu a-favór 41, kontra 0 no abstensaun haat (4), segunda (20 novembru 2023). Imajen Tatoli.António Gonçalves.

DILI, 20 novembru 2023 (TATOLI)—Parlamentu Nasionál (PN), segunda ne’e, liuhosi reuniaun plenária aprova proposta-lei númeru 2/VI/1a, alterasaun datoluk lei númeru 3/2014, 18 juñu, ne’ebé kria RAEOA no estabelese ZESSM no Ataúro iha finál globál ho votu a-favór 41, kontra 0 no abstensaun haat (4).

Notísia Relevante: ”Ha’u lee deklarasaun FRETILIN maibé alterasaun lei kriasaun RAEOA atu hadi’a’’

Aliénde ne’e, deputadu sira mós aprova proposta-lei númeru 3/VI(1a), alterasaun dahaat lei númeru 11/2009, 7 outubru, ne’ebé aprova Divizaun Administrativa ho rezultadu votu ne’ebé hanesan.

“Hodi nune’e lei ne’e pasa,” Prezidente Parlamentu Nasionál, Maria Fernada Lay, hateten iha sala plenária PN.

Ho aprovasaun ne’e meza sei envia proposta-lei rua refere ba iha Prezidente Repúblika mak iha kompeténsia eskluziva atu promulga ka veta.

Ministru Prezidénsia Konsellu Ministru (PCM, siglá portugés), Agio Pereira, hato’o agradesimentu ba kontribuisaun deputadu sira-nian durante hala’o debate hodi hakle’an no klarifika liután to’o mai iha finál globál.

Iha diskusaun proposta lei ne’e iha faze jeneralidade hato’o ona katak, povu Oé-Cusse nia moris di’ak importante tebes ba nasaun Timor-Leste, tanba ne’e mak motiva tebes Governu atu aprezenta ba reprezentante povu iha PN kona-ba alterasaun refere.

Antes ne’e, Ministru Prezidénsia Konsellu Ministru (PCM, siglá portugés), Agio Pereira, aprezenta proposta alterasaun lei RAEOA ne’ebé Governu aprezenta iha objetivu prinsipál lima.

Objetivu dahuluk, hakarak atu hadi’a estatutu RAEOA no atualiza estatutu ne’e hodi hatudu mudansa iha jestaun administrasaun públika nasionál no finansa públika.

“Proposta ne’e, ninia objetivu mós mak atu ajusta dispozisaun kona-ba relasaun tutela no superintendénsia ne’ebé Governu tenke ezerse, hanesan órgaun soberanu kona-ba rejiaun ne’e. Proposta ne’e mós propoin atu hametin mekanizmu kontrolu no autonomia orsamentál no finanseira RAEOA nian, nune’e bele hanesan liu ho setór públiku administrativu,” nia dehan.

Ho proposta lei ne’e, Governu propoin atu hasai posibilidade RAEOA nian atu iha rejime fiskál rasik, hodi mantein unidade rejime tributáriu nasionál.

Maske nune’e, proposta ne’e sei permite hodi kria impostu espesífiku, taxa impostu nian ne’ebé la hanesan no atribui parte balun hosi impostu ne’ebé kobra ona iha rejiaun hanesan reseita lokál.

Objetivu daruak, atu hasai lei númeru 3/2014, 18 juñu, konseitu kona-ba ordenamentu jurídiku estranjeiru, hanesan orden ezekutiva, ne’ebé laiha suporte konstitusionál no la tuir realidade lokál.

Ida-ne’e sei permite katak RAEOA fó-sai regulamentu administrativu rejionál sira, bainhira regra sira-ne’e tuir lei ne’ebé vigora iha territóriu nasionál.

Objetivu datoluk, atu integra norma sira-ne’ebé hatuur ona iha dekretu-lei númeru 5/2015, 22 janeiru, ba lei númeru 3/2014, tanba Governu konsidera norma sira-ne’e tenke trata tuir lei hosi Parlamentu Nasionál.

Proposta ne’e buka atu estabelese ho loloos asuntu sira-ne’ebé kompete eskluzivamente ba Governu no ba matéria sira-ne’ebé bele delega ka bele halo de’it hosi RAEOA.

Asuntu sira hanesan defeza, seguransa, orden públika, relasaun externa, kooperasaun bilaterál no multilaterál no atividade petrolífera tenke nafatin iha kompeténsia eskluziva hosi Governu.

Objetivu dahaat, atu ajusta estatutu RAEOA tuir klasifikasaun ne’ebé estabelese ona iha tinan 2022 hosi Tribunál Rekursu, ne’ebé integra ba iha administrasaun indireta Estadu.

Ida-ne’e signifika katak, Prezidente Autoridade Rejiaun bainhira hala’o ninia kna’ar tenke presta konta ba Primeiru-Ministru kona-ba ninia serbisu no dezenvolvimentu sosiu ekonómiku rejiaun nian.

Objetivu dalimak, hakarak atu delega definisaun hosi zona espesiál sira dezenvolvimentu ekonómiku nian ba diploma ketak ida, tanba ne’e tenke retira referénsia sira hotu kona-ba ZEESM Oé-Cusse no Ataúro nian, hosi lei númeru 3/2014, 18 juñu.

Governante ne’e hateten, IX Governu Konstitusionál mai aprezenta inisitiava alterasaun ne’e hakarak povu Oé-Cusse tomak nia moris di’ak, no la hanoin atu halakon rejime zona espesiál sosiál merkadu nian maibé atu kria modelu ida-ne’ebé bele adota iha parte hotu-hotu hosi territóriu nasionál.

Ida-ne’e, atu permite katak ema hotu bele iha asesu ba dezenvolvimentu ekonómiku no sosiál hodi kombate asimetria rejionál sira no modelu zona espesiál ida dezenvolvimentu ekonómiku própriu Timor-Leste nian, ne’ebé haree ba espesifisidade hosi rejiaun oioin iha ita-nia nasaun.

Enkuantu, tuir proposta lei númeru 2/VI (1a), terseira alterasaun lei númeru 3/2014,18 juñu, ne‘ebé kria Rejiaun Administrativa Espesiál Oé-Cusse no Ambeno (RAEOA) no estabelese Zona Espesiál Ekonómia Sosiál  Merkadu (ZEESM) no Ataúro, Governu hakarak altera hosi lei vijente ba artigu 4, 5, 9, 10, 11, 12, 15, 16, 17, 18, 19, 20, 21, 22, 23, 24, 28, 29, 30, 32, 35, 36, 39 no 42, nune’e mós aditamentu artigu 8-A, 9-A no 17-A.

PN iha loron 24 outubru 2023 aprova proposta-lei númeru 2/VI (1a), terseira alterasaun lei númeru 3/2014, 18 juñu, ne‘ebé kria Rejiaun Administrativa Espesiál Oé-Cusse no Ambeno (RAEOA) no estabelese Zona Espesiál Ekonómia Sosiál  Merkadu (ZEESM) no Ataúro ho votu afavór 37, kontra 19 no abstensaun haat (4).

Meza PN tau ona ajenda reuniaun plenária diskusaun iha finál globál ba proposta lei sei hala’o loron 20 fulan novembru ne’e.

Antes ne’e, Ministru Administrasaun Estatál (MAE), Tomás do Rosário Cabral, hato’o informasaun jerál Governu lori fali alterasaun dahaat lei númeru 11/2009, 07 outubru ba Divizaun Administrativu Territóriu no iha alterasaun ne’e la barak iha artigu rua ka tolu de’it.

“Ida mak ko’alia kona-ba Ataúro, tanba Ataúro iha alterasaun ba kotuk tama hela iha postu administrativu Dili, ne’ebé ho alterasaun ne’e mai Ataúro iha artigu 4, nia tama ona iha sirkunstánsia administrasaun ne’ebé iha,” Tomas Cabral hateten.

Iha alterasaun ne’e mós, hadia mós postu administrativu balun iha munisípiu Ermera mak Hatulia A no B no mós iha munisípiu Lautém atu akresenta iha lei Divizaun Administrativa Territóriu atu bele asegura sira-nia funsionamentu iha nível munisipál sira.

“Ataúro iha artigu 4 ohin ne’e, abranje illa Ataúro ne’e ka mantein nafatin kapitál ka sidade ne’e iha antiga vila Maumeta. Tanba ne’e, ami atu reajusta fila-fali Ataúro ne’ebé iha estatutu agora iha hela, depois aprovasaun lei ne’e bele avanza ba dekretu Governu no iha mós fundu espesiál ba Ataúro iha Governu anteriór funsiona hela iha aktu sira-ne’ebé liu ba,” nia hateten.

Tanba ne’e, Governu hodi fali mai iha Parlamentu Nasionál husu aprovasaun liuliu munisípiu Ermera iha Hatulia A no B no munisípiu Lautém iha Lore, Luro ho Tutuala no iha munisípiu Dili mak hasai tiha Ataúro hosi sirkunstánsia administrasaun Ataúro ba Dili nian, nia iha lei anteriór seidauk revogadu Ataúro sei hola parte hela iha postu administrativu Dili.

Iha debate finál globál ne’e, aprezenta mós relatóriu diskusaun no votasaun iha espesialidade hosi komisaun A trata asuntu Justisa no Konstituisionál ba proposta-lei ne’e katak, durante diskusaun Deputadu sira aprezenta proposta neen (6) ne’ebé hetan aprovasaun mak proposta dahuluk kona-ba alterasaun títulu proposta lei, proposta alterasaun daruak iha artigu 5 hosi proposta inisiál iha epigráfu ‘Objetivu’altera muda ba ‘Atribuisaun’.

Proposta datoluk ne’ebé hetan pasa mós ba alterasaun iha númeru 2 artigu 16 iha proposta-lei  trata ‘Kompeténsia Autoridade’.

Proposta dahaat mak alterasaun númeru 2 artigu 17 iha proposta-lei relasiona ho kompozisaun autoridade RAEOA pasa kompostu membru hitu (7), emvez na’in-lima (5), hodi fixa kuota minima reprezentasaun jéneru.

Proposta lima alterasaun prevista kona-ba artigu 22 iha proposta-lei ne’e (Kompeténsia Prezidente Autoridade), artigu 23 (Konsellu Konsultivu), iha artigu 22 ho objetivu kurije redasaun alínea e) no artigu 23 ho objetivu kurije redasaun iha númeru 3.

Proposta ikus alterasaun inísia kona-ba artigu 19 iha proposta-lei ne’e (Mandatu Prezidente Autoridade) ho proposta alterasaun ho objetivu kurije textu númeru 6, kona-ba ‘inkompatibilidade kargu Prezidente Autoridade’, armoniza ho redasaun hosi númeru 5 artigu 17.

Proposta sira ne’ebé aprova ne’e aprezenta hosi Deputadu bankada Governu.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!