iklan

BOBONARO, HEADLINE, MUNISÍPIU, POLÍTIKA

Autoridade Bobonaro aloka rihun $29 komemora 28 Novembru

Autoridade Bobonaro aloka rihun $29 komemora 28 Novembru

Prezidente Autoridade Munisípiu Bobonaro, Ernesto de Oliveira Barreto. Imajen espesiál.

BOBONARO, 21 novemrnu 2023 (TATOLI) – Autoridade Munisípiu Bobonaro (AMB) aloka orsamentu rihun $29 hodi komemora loron Proklamasaun Unilaterál Independénsia 28 Novembru ba dala-48.

Prezidente Autoridade Munisípiu Bobonaro, Ernesto de Oliveira Barreto, esklarese montante orsamentu ne’e atu finánsia ba serimónia ichar bandeira no tomada pose ba xefe suku eleitu sira-ne’ebé sei realiza kada postu administrativu.

“Ita-nia orsamentu munisípiu hamutuk rihun $29 atu aloka ba postu administrativu neen, no hosi STAE hamutuk $4,400, entaun totál orsamentu tinan ne’e ba 28 novembru hamutuk $33,400 fahe ba postu neen atu prepara konsumu no atividade seluk,” nia informa ba jornalista sira iha Maliana, tersa ne’e.

Alende ne’e, iha mós orsamentu hosi Ministériu Kompetente  atu realiza atividade desportu ne’e.

“Orsamentu ba desportu ne’e ketak ida, to’o oras ne’e ha’u seidauk hatene, postu ida atu hetan hira, tanba sira sei halo pembagian, nia atividade buat ida joga bola ne’e laiha tempu ona, maibé desportu ne’e la signifika joga bola de’it, buat ida sa’e-bua, dada tali, halai karon, tata berlindus, buat sira-ne’e horisehik ko’alia hotu, Ema hotu-hotu bele menikmati,” nia haktuir.

Ernesto halo enkontru preparasaun ho diretór servisu munisipál no delegasaun territoriál sira fó despaxu ba Komisaun Organizadora no fahe tarefa servisu hodi destaka diretór no xefe departamentu kada postu administrativu ema na’in-rua.

Daudaun ne’e Komando Polisía Nasionál Timor-Leste, Munisípiu Bobonaro, Batallaun Orden Públika (BOP) kompañia Delta Soso, Maliana no  FALINTIL-Forsa Defeza Timor-Leste (F-FDTL) destamentu postu Tunubibi fó hela formasaun ba Corpo Ichar Bandeira Nasionál.

“Iha Maliana, Ministra Edukasaun mak sei prezide serimónia ichar bandeira, no membru governu balu ba iha postu administrativu sira,” Ernesto hateten.

Atu harame eventu nasionál ne’e, Prezidente Autoridade Munisípiu Bobonaro husu ba komunidade liuliu joven sira atu partisipa másimu.

“Ita-nia ukun-aan ida ne’e la’ós ema fó iha bandeiza, maibé liuhosi sofrementu lubuk ida, ema barak mak fó nia vida, ohin loron la goja rai ida-ne’e, entaun ita ne’ebé moris atu komemora loron ida-ne’e, hakarak ka lakoi ita hotu tenke partisipa atu harame no fó omenajen ba ita-nia eroi sira-ne’ebé liu ona ba mundu seluk,” nia apela.

Notísia relevante: MAE atualiza ba Horta kona-ba preparativu selebrasaun 28 Novembru no posse Xefe Suku

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!