VIQUEQUE, 21 novembru 2023 (TATOLI)—Servisu Diresaun Transporte Terrestre (DNTT) munisípiu Viqueque rekolla reseita hamutuk $56.941 ba kofre Estadu durante fulan-10, hahú janeiru to’o outubru.
“DNTT rekolla reseita liuhosi inspesaun dokumentu karreta no motorizada sira ne’ebé maka kada tinan halo inspesaun no multa inklui infrasaun sira seluk,” Diretór DNTT munisípiu Viqueque, Saul Henrique, informa iha ninia knaar fatin, Beloi, tersa ne’e.
Reseita iha janeiru $7.805, fevereiru $6.900, marsu $6.392,50, abríl $2.955, maiu $3.927,50, juñu $5.151, jullu $3.365, agostu $7.800, setembru $5.805 no outubru 5.940.
“Ami fó ona teste ba ema na’in-3.200 hodi hetan karta kondusaun iha tinan 2022, maibé ema na’in-200 resin mak simu ona dokumentu no karta kondusaun. Daudaun ne’e ami sei rai hela iha eskritóriu, nune’e biban ne’e ha’u hakarak informa motorista sira ne’ebé seidauk foti karta kondusaun bele mai foti,” nia hato’o.
Notísia relevante : DNTT Viqueque rekolla taxa rodoviária $24.000 resin durante fulan-haat
Biban ne’e, nia husu ba Ministériu Transporte Terrestre (MTK) atu prevee mákina imprime karta kondusaun orijinál iha Viqueque, iha orsamentu tinan 2024, nune’e bele fasilita serbisu funsionáriu sira no la presiza la’o to’o munisípiu Baucau.
Aleinde ne’e, daudaun DNTT Viqueque menus rekursu hodi halo atendimentu públiku.
“Dezafiu ne’ebé daudaun ne’e ami enfrenta maka menus rekursu umanu tanba ami iha rekursu na’in-haat maka loron-loron halo atendimentu ba kliente. Ministériu presiza tau orsamentu tinan 2024 hodi tau atensaun reforsa rekursu hodi halo atendimentu kliente sira,” nia tenik.
Jornalista : Vitorino Lopes da Costa
Editora : Julia Chatarina
