Fotografia istórika proklamasaun 28 novembru iha “Billboard” foti hosi dokumentasaun 2021-2022
DILI, 21 novembru 2023 (TATOLI)–Vise Prezidente Komisaun Organizadór, Jacinto Rigoberto, hateten fotografia istórika proklamasaun independénsia 28 novembru 1975 ne’ebé públika iha Billboard 28 novembru 2023 ba dala-48 ne’e foti hosi dokumentasaun 2021-ho 2022 nian.
Notísia Relevante: FRETILIN lamenta komisaun organizadora 28 Novembru ko’a-sai fotografia líder nasionál balun
“Fotografia ne’ebé ami públika iha Billboard, mak fotografia ne’ebé ami foti hosi dokumentasaun uluk nian, iha tinan 28 novembru 2021 ho 28 novembru 2022. Haree katak entre fotografia lubuk ida-ne’ebé ami eskolla, loos duni, iha fotografia balun ne’ebé imajen kompletu. Maibé, fotografia kompletu sira-ne’ebé ita iha, nia rezolusaun la permite atu emprime ho medida boot,” Vise Prezidente Komisaun Organizadora no Atauál Vise Ministériu Administrasaun Estatál (MAE) ne’e hateten iha konferénsia imprensa, iha salaun VIP MAE Colmera, tersa ne’e.
Tanba ne’e, tuir nia, referénsia utilizasaun fotografia sira ba eventu Komemorasaun 28 Novembru ba tinan ida-ne’e, hanesan fotografia ne’ebé komisaun organizadora uza iha konvite pájina ida (1).
“Ami simu lamentasaun sira hotu hosi públiku no hakarak hato’o iha ne’e katak publisidade ne’e “por lapsu”. Hakarak deklara sinseramente katak laiha intensaun tantu intensaun tékniku no polítiku hodi hasai tiha ka koa-sai tiha metade hosi fotografia entidade ka foto hosi ita-nia Lider Nasional balun,” nia dehan.
Prezidente Komisaun Organizador ne’e hateten, Komisaun nafatin mantein ho Billboard ida-ne’e iha selebarsaun 28 novembru tinan ne’e, no ba oin sei haree no hadi’a fotografia ne’e maibé agora labele tanba tempu badak ona no hela loron hirak de’it ona.
Tanba ne’e hodi naran seksaun sekretáriadu, protokolu no publisidade ho hodi naran Komisaun Organizadora no naran IX Governu Konstitusionál, ba dahuluk hakarak hato’o deskulpa ba públiku, deskulpa ba entidade sira hotu ne’ebé mak afeta direta ka indireta hosi publisidade Bilboard ba komemorasaun aniversáriu proklamasaun independénsia ba dala-48 Repúblika DemokrátiKa Timor-Leste.
Jornalista : Osória Marques
Editór : Cancio Ximenes
