Top

Preparasaun ba komemorasaun 28 novembru atinje ona 80%

Prezidente Komisaun Organizadora, Jacinto Rigoberto, ho ekipa halo konferénsia imprensa hodi informa kona-ba preparasaun ba komemorasaun loron proklmasaun independénsia 28 novembru, tersa (21 novembru 2023). Imajen Tatoli/Osória Marques.

DILI, 21 novembru 2023 (TATOLI)—Vise Prezidente Komisaun Organizadora, Jacinto Rigoberto, hateten preparasaun ba komemorasaun loron proklamasaun independénsia 28 novembru ba dala-48 (28-11-1975—28-11-2023) ho tema “Celebrar História e Construir o Futuro ka Selebra Isória Harii Futuru” ne’e atinje ona 80%.

Notísia Relevante: FRETILIN lamenta komisaun organizadora 28 Novembru ko’a-sai fotografia líder nasionál balun

“Konvite distribui ona kuaze 80% no hela de’it mak 20% ne’e atu kompleta. Sesaun ka Içar Bandeira nian mós preparadu hela, parte lojistiku nian ekipa hahú mobiliza tenda ba Palásiu Governu nian, nune’e aban ho bainrua hahú monta ona,” Vise Prezidente Komisaun Organizadora no Atuál Vise Ministru Administrasaun Estatál (MAE) ne’e hateten liuhosi konferénsia imprensa ne’ebé realiza iha salaun VIP MAE Colmera, tersa ne’e.

Hili tema ida-ne’e tanba IX Governu Konstitusionál nia prioridade iha mandatu periódu ida-ne’e hakarak iha mudansa ba dezenvolvimentu, nune’e loron nasionál sei baze, referénsia no enkoraja hodi aselera hodi konstrui Timor-Leste nia futuru.

“Haree ba IX Governu nia prioridade katak Governu nia mandatu tinan lima hakarak iha mudansa. Tanbe ne’e, ita hili tema ‘Selebra Istória Harii Futuru’, nune’e iha mudansa ba períodu ida-ne’e,” nia dehan.

Grupu içar Bandeira ne’e komisaun foti hosi reprezenta munisípiu 13 maibé barak ne’e foti hosi Dili no sira la’ós Dili oan, sira kuaze metade hosi sira iha ona esperiénsia dada bandeira no haree sira iha mentalidade hodi envoleve iha grupu içar Bandeira ne’e.

Ba komemorasaun loron Proklamasaun Independénsia ba dala 48 (28 novembru 1975-28 novembru 2023) ne’e, Governu aloka orsamentu hamutuk rihun $460.

Jornalista : Osória Marques

Editór       : Cancio Ximenes

 

Publisidade

Leave a Reply

Latest Post

error: Content is protected !!