Tékniku EDTL, E.P no abitante Loco-Loco Uatulari hahú hatuur ai-rin liña eletrisidade
VIQUEQUE, 21 novembru 2023 (TATOLI)—Ekipa téknika Eletricidade de Timor-Leste, Empreza Públika (EDTL, E.P) no abitante, tersa ne’e, hahú hatuur ai-rin eletrisidade iha aldeia Loco-Loco, suku Matahoi, postu Uatulari, ne’ebé tinan barak ona la asesu ahi eletrisidade.
“Ne’e hanesan projetu komunitária ne’ebé abitante sira halo serbisu voluntáriu hodi hatuur ai-rin. Ida-ne’e ami sente kontente ona tanba tempu badak ami mós bele asesu ba ahi eletrsidade,” Xefe aldeia Loco-Loco, Manuel dos Santos, informa ba Agência Tatoli, via telefónika, tersa ne’e.
Notísia relevante : Abitante aldeia Loco-Loco Uatulari tinan-20 nia laran la asesu eletrisidade
Biban ne’e, líder komunitáriu ne’e agradese ba Governu tanba liuhosi EDTL, E.P bele rezolve ona povu nia preokupasaun durante tinan barak nia laran.
“Ami espera projetu komunitáriu ida-ne’e bele finaliza iha tempu badak atu nune’e ami bele hetan naroman tanba ami la asesu eletrisidade desde restaurasaun independénsia ka durante tinan-20 resin nia laran ona,” nia tenik.
Aldeia Loco-Loco iha uma-kain hamutuk 723 hosi populasaun hamutuk 200 resin.
Jornalista : Vitorino Lopes da Costa
Editora : Julia Chatarina
