DILI, 20 novembru 2023(TATOLI)-Governu Dasia liuhosi Vise Primeiru-Ministru no Ministeriu Kordenadór Asuntu Ekonómia Francisco Kalbuadi Lay, hetan apoiu hosi Prezidente Kámara Komérsiu Indústria Timor-Leste (CCI-TL, sigla portugés) sei organiza forum intenasionál ida ho naran Timor-Leste Internasional Business forum, ne’ebe sei hahú hosi 23 to’o 25 fulan-novembru 2023 iha kapitál Dili.
Timor-Leste Internasional Business forum ho objetivu atu promove Timor-Leste ninia área pontesiál sira hanesan turizmu, agrikultura, pekuária, peska, sósiu no kulturál nune’e bele atrai emprezariu hosi rai-liúr bele halo investimentu ba potensialidade ne’ebé maka Timor-Leste iha.
“Ami hamutuk ho CCI-TL sei organiza forum negósiu ho naran Timor-Leste Internasional Business forum, durante loron rua ne’e atu promove seitór ne’ebé mak Timor-Leste iha liuliu seitór turizmu, ótelaria no seitór sira seluk atu ema bele haree hodi bele mai investe iha ita-nia rai,” Vise Primeiru Ministru no Ministeriu Kordenadór Asuntu Ekonómia, Francisco Kalbuadi Lay, hateten ba jornalista sira iha Palasiu Governu segunda ne’e.
Forum negosiu ne’e, tuir planu sei partisipa hosi nasaun Austrália, Brázil, Brunei, Kambódia, Xina, Olanda, Hong Kong, Indonézia, Índia, Japaun, Korea Súl, Laós, Myanmar, Malázia, Filipina, Qatar Tailándia, Taiwan no Vietname purvolta iha ema 600-resin.
Governu Konstitusionál Dasia, lideradu hosi Primeiru-Ministru, Kay Rala Xanana Gusmão, hakarak aselera dezenvolvimentu iha setór ekonomia liuliu indústria kiik no médiu sira iha Timor-Leste.
“Emprezariu sira tenke ba oin, ita atu ba oin ita tenke nakloke ba investór sira ekonomia ne’e la’o tenke hetan apoiu investór sira hosi rai-liur, tanba ida ne’e ita agradese tebes ba Nai Primeiru-Ministru tanba nia mós fó apoiu bo’ot tebes ba iha eventu ida ne’e no Prezidente Repúblika, José Ramos Horta,”nia hateten.
Governante ne’e garante katak hosi konferénsia internasionál ne’e, fiar katak emprezáriu barak hosi rai-liur iha interese atu mai investe iha Timor-Leste tanba daudaun ne’e Timor-Leste iha ona estabilidade iha rai-laran.
“Ho oportunidade ida ne’e seitór privadu iha ita-nia rai bele mós hahú ona sira nian atividade, konetividade sira bele hahú sira nian relasaun ho investór sira mai hosi rai-li’ur,” nia haktuir.
Iha fatin hanesan Prezidente CCI-TL, Jorge Serano hateten eventu Timor-Leste Internasional Business forum ne’e importanre ba Timor-Leste atu oinsá ita bele esplora liuliu seitór pontesíal sira ne’ebé atu dada investór mai TL hodi investe.
“Ha’u hanoin ita labele taka dala ba ema sira ne’ebé atu mai iha Timor-Leste, rai hotu presiza investimentu atu hatene Timor-Leste, liuhosi eventu ida ne’e forma ida atu buka parseiru negósiu investimentu ba povu,” nia dehan.
“Agora ne’e ita ko’alia kona-ba investimentu la’os loke kioske, tanba nee mak IX Governu hakarak dudu seitór privadu nasionál halo investimentu. Ita presiza halo eventu sira hanesan ne’e para promove ita-nian setór privadu no ita-nia seitór sira ne’ebé maka iha atu ema bele mai investe, tak kenal mak tak sayang entaun mai,” nia hateten
“Liuhosi oportunidade ne’e ita a estabelese tiha parseru maske Timo-Leste rai ki’ik maibé iha invetimentu barak,”nia konklui.
Jornalista: Natalino Costa
Editór : Agapito dos Santos
