DILI, 21 novembru 2023 (TATOLI) – Universidade Nasionál Timor Lorosa’e (UNTL) nesesita investimentu ba dosente sira ho idade produtiva iha área mestradu no doutoramentu, nune’e bele garante rekursu umanu iha futuru.
Vise-Reitór ba Asuntu Pós-Graduasaun no Peskiza, Afonso de Almeida, admite katak bainhira la investe ba dosente sira ho idade produtiva iha área rua ne’e maka sei hasoru dezafiu iha tinan lima mai.
“Problema boot ida ba UNTL iha futuru maka rekursu umanu. Imi bele haree dosente sira agora doutoradu ne’e maioria mesak idade 50 ba leten de’it”, vise-reitór dehan ba Tatoli iha Kampus Sentrál.
Nia salienta katak atu prepara dosente jerasaun foun ho kualidade iha mestradu no doutoramentu ne’e presiza tempu. “Sé ida ne’e maka UNTL la tau atensaun agora, tinan lima mai tan dosente idade sira tama hotu ona reforma, bele lori problema boot ba kualidade no ensinu apredizajen UNTL nian”, afirma.
Tuir vise-reitór, problema sira ne’e universidade hatene hela, maibé to’o agora seidauk iha esforsu ida maka UNTL halo atu responde ba dezafiu sira ne’e. “UNTL hanesan instituisaun públika ida presiza atu fó hanoin ba Komisaun Funsaun Publika atubele aselera ona prosesu rektutamentu ba dosente sira ho idade joven ne’ebe kualidade atu bele bá kontinua ona sira-nian estudu iha nivel mestradu no doutoramentu”.
“Sé ida ne’e maka KFP la responde, iha dalan seluk maka Governu tenke fó outonomia ba UNTL atubele investe ona ba joven sira ne’ebe iha poténsia hodi kontinua sira-nian estudu iha mestradu no doutoramentu”, realsa.
Daudaun, UNTL labele halo papel ida ne’e tanba laiha duni kompténsia. Orsamentu atu aloka ba item hodi prepara rekursu umanu ho adekuadu ba futuru nian mós kontinua hein Governu.
Afonso de Almeida sujere atu iha 2024 Ministériu Ensinu Superiór bele tau ona orsamentu atu halo rekrutamentu ba estudante finalista sira hodi estuda iha área rua ne’e hodi troka fali jerasaun antiga sira.
“UNTL iha estudante finalista barak maka iha kualifikasaun di’ak ne’ebé sei sai asset ba iha futuru, maibé UNTL labele rektuta sira tanba estudante sira ne’e la’ós funsionáriu públiku. UNTL iha de’it kompétensia atu halo kontratu ho dosente jerasaun foun ida ho kualidade atu mai hanorin de’it. Agora, atu garante ninia estudu ne’e labele tanba kompeténsia tomak iha Governu nia liman”, esplika.
Ba Afonso de Almeida, iha dalan seluk mak UNTL bele rekomenda ba Ezekutivu halo negosiasaun hodi hato’o nia difikuldade sira katak universidade atu halo rekrutamentu ba dosente sira hodi kontinua sira-nian estudu iha área importante rua ne’e no eskola Governu mak selu.
Tuir dadus Diresaun-Jerál Gabinete Sertifikasaun Dosente Universitáriu, totál dosente mestradu no doutoramentu ne’ebé hanorin iha UNTL hamutuk 354 (doutoramentu 71 no mestradu 283).
Notísia relevante: UNTL mellora infraestrutura sira hodi garante ensinu ho kualidade
Jornalista: Tomé Amado
Editora: Maria Auxiliadora
