DILI, 17 novembru 2023 (TATOLI) – Universidade Nasionál Timor Lorosa’e (UNTL) hahú mellora nia infraestrutura sira hodi responde ba ezijénsia estudante nian atu garante kualidade ensinu, liuliu iha prátika nian.
Tanba ne’e, iha tinan oin, UNTL prevee ona millaun $1-resin, ba konstrusaun laboratóriu ba estudante sira iha Fakuldade Siénsia Ezata.
Reitór UNTL, João Soares Martins, afirma katak intensaun atu konstrui laboratóriu ne’e ajuda prosesu ensinu ba estudante sira ne’ebé hamahan aan iha Fakuldade Siénsia Ezata hodi bele garante sira-nian progresu iha estudu.
“Laboratóriu ne’e importante, tanba dalabarak estudante sira ezije ekipamentu la adekuada ba universidade, nune’e liuhusi planu ne’ebé UNTL kria daudaun ne’e ba futuru bele tulun sira hodi hetan matéria prátika ho adekuada atubele hakerek sira-nian monografia”, João Martin hatete iha komemorasaun Dies Natalis UNTL ba dala-23 iha Kampus Sentrál, ohin.
Nia lembra katak UNTL hamriik iha loron 17 novembru 2000. Antes ne’e, iha de’it fakuldade lima, maibé ohin loron UNTL iha ona fakuldade 10 ho kursu 41, maski iha kursu 20 mak seidauk rejista.
“Uluk, UNTL iha de’it edifísiu ne’ebé maka antigu husi konstrusaun Portugál nian hanesan Liceu no Indonézia nian maka kampus Medisina iha Lahane Osidentál. Ohin loron iha ona edifísiu foun lubuk ida maka UNTL konstrui rasik iha Hera inklui iha kampus Caicoli no iha kampus sentrál”, relembra.
Nia salienta, uluk, universidade enfrenta limitasaun ba ekipamentu hanesan kadeira, meza, livru sira la adekuadu atu garante prosesu ensinu inklui rekursu umanu. “Maibé, ho esforsu ne’ebé iha, kada loron, fulan no tinan, hahú iha mudansa no ohin UNTL bele ultrapasa dezafiu sira ne’e no konsege rezolve difikuldade ne’ebé iha”.
Husi esforsu ne’ebé la’o daudaun ne’e, UNTL mós konsege loke tan ona ninia kursu mestradu hitu maka rejista ona inklui kursu lima sei iha prosesu – tolu hetan ona avaliasaun husi Ministériu Ensinu Superiór, Siénsia no Kultura no kursu rua foin tama iha planu atu loke iha tinan oin.
Notísia relevante: UNTL disponibiliza formasaun língua portugueza ba kandidatu mestradu sira
Iha mós progresu seluk ne’ebé maka UNTL atinje maka rekursu umanu iha ona dosente sira husi rejime karreira foun hamutuk 310 maka tama ona ba promosaun progresaun dosente iha 2022, maibe sira-nian direitu inkluzivamente salariál foin mak hahú iha 2023. “Ita kontinua halo ezersísiu atu dosente ne’ebé seidauk goza progresaun ne’e bele hetan mós oportunidade”, afirma.
Notísia relevante: Serimónia solene aniversáriu UNTL
Jornalista: Tomé Amado
Editora: Maria Auxiliadora
