OÉ-CUSSE, 22 novembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, atribui sertifikadu rekoñesimentu ba funsionáriu sira-ne’ebé durante mandatu, hahú hosi 2019 to’o 2023.
Atribuisaun sertifikadu apresiasaun ne’e realiza iha Gabinete ZEESM Oé-Cusse, kuarta ne’e, hodi atribui ba membru Autoridade sira hamutuk na’in-sia, asesór, xefe Gabinete, diretór no xefe departamentu sira no funsionáriu sira.
“Ohin ne’e, ami Autoridade hakarak rekoñese ita-boot sira, apresiasaun ba ita boot sira-nia servisu durante tinan tolu hamutuk ho ha’u iha mandatu tinan tolu, ha’u husu hamutuk hanoin ida de’it, Oé-Cusse tenke ba oin,” Bano, ko’alia iha ámbitu ne’e.
Notísia relevante: Nomeasaun ba Autoridade RAEOA foun tarde, bele afeta ba saláriu funsionáriu sira
Bano dehan, funsionáriu, kargu xefia sira, presiza koopera, kontinua presta servisu hanesan servidór Estadu, nune’e bele aselera funsionamentu ba atendimentu públiku sira iha Oé-Cusse.
“Obrigadu ba tinan tolu, agora ba fulan 40 kompleta ona, ita-boot sira servisu ho ha’u, deskulpa karik durante ha’u-nia mandatu halo buat ruma la kona ita-boot sira, maibé ita hotu hakarak Oé-Cusse tenke ba oin,” nia orgullu.
“Diretór sira, xefe departementu, ami haree imi tenki semangat, ita semangat ba Oé-Cusse, servisu nafatin, hodi hein autoridade foun, mai akonsela didi’ak, ko’alia didi’ak atu rai ne’e la’o ba oin, labele halo problema ba malu, labele senti triste tanba Oé-Cusse maka importante liu, tenki ba oin,” nia fó hanoin.
Iha biban ne’e, Jestór sub-rejiaun Pássabe, Anton Ulan, reprezenta funsionáriu sira iha Oé-Cusse agradese ba dedikasaun Autoridade RAEOA iha tinan tolu, hatudu progresu di’ak no hatudu asaun ba povu Oé-Cusse.
“Ohin ne’e la’ós hanesan sorumutu ikus ho autoridade RAEOA, tán ne’e ami agradese ba ita-boot sira na’in-10, dedika ona ita-boot sira atu hala’o servisu Estadu nian ba povu Oé-Cusse, liuliu infraestrutura sira no seluk-tán,” nia agradese.
Notísia relevante: Arsénio Bano no membru autoridade rezigna-an
Jornalista: Abílio Elo Nini
Editór: Evaristo Soares Martins
