OÉ-CUSSE, 21 novembru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Prezidente Autoridade, Arsénio Paixão no membru Autoridade sira, tersa ne’e deklara rezigna-an.
“Lokraik ne’e, ha’u ho adjuntu, adjunta no membru Autoridade tomak hamutuk na’in-10 iha-ne’e, hato’o ba populasaun katak, depois tetu no halo diskusaun, ohin ami hato’o ba populasaun Oé-Cusse, katak Autoridade RAEOA, hanesan Prezidente Autoridade ho membru autoridade rezigna-aan bloku (estrutura),” Arsénio Bano, deklara liuhosi konferénsia imprensa hala’o iha Gabinete ZEESM Oé-Cusse.
Notisia relevante:PN aprova alterasaun lei kriasaun RAEOA-ZEESM iha finál globál
PA RAEOA informa, ekipa ne’ebé nia (Arsénio) lidera dezde loron 01 jullu 2023, hafoin loron ida IX Governu lidera hosi Primeiru-Ministru Xanana Gusmao, atu hetan tomada pose.
“Ami hakerek karta ida ba Primeiru-Ministru Ministru IX Governu, atu felisita, no mós hatudu vontade atu servisu hamutuk no husu hato’o ami-nia dispozisaun hodi fasilita tranzisaun no tomada pose kona-bá futuru lideransa ba RAEOA,
“Dezde 01 jullu to’o agora ami seidauk hetan resposta, ami kontinua manda karta dala-10 no ami kontinua hein atu Governu nomea ema foun atu troka ami, to’o horisehik, depois aprovasaun ba revizaun lei númeru 3/2014 iha Parlamentu Nasionál, seidauk iha ema foun atu troka ami,” nia afirma.
Notisia relevante:FRETILIN halo rekursu ba alterasaun lei kriasaun RAEOA-ZEESM
Arsénio Paixão Bano, hateten, Autoridade RAEOA asegura funsionamentu RAEOA no ZEESM-TL, durante loron 120, hosi tomada pose Primeiru-Ministru no membru Governu sira.
Primeiru-Ministru iha kompromisu ba povu Timor-Leste, katak, iha loron 120 nia laran, sei aprezenta ba povu Timor-Leste inklui povu Atoni Oé-Cusse.
“Maibé ohin liu ona loron 24, data promesa hosi Primeiru-Ministru, no ohin ita hotu sasin, katak, Primeiru-Ministru seidauk iha desizaun ruma kona-bá futuru lideransa RAEOA nian,” nia relembra.
“Ami hanesan Autoridade, hein katak ho ami-nia desizaun rezigna-an bloku (estrutura) ne’e, desizaun ida-ne’e bele hakmaan Primeiru-Ministru nia servisu no fasilita konsensu iha koligasaun nia laran no halais prosesu servisu hotu,” nia husu.
Atuál Prezidente Autoridade RAEOA ne’e, informa, desizaun atu rezigna-an ne’e nu’udar desizaun atu ajuda foti desizaun kona-bá futuru lideransa, no permite futuru lideransa estuda no aprende kona-bá orsamentu ne’ebé Governu Sentrál impoin ba lideransa foun.
“Ne’ebé, tuir loloos iha semana oin presiza ba defende orsamentu RAEOA nian iha Parlamentu Nasionál, tán ne’e ha’u empresta alegoria hosi Primeiru-Ministru, Maun Boot Xanana Gusmão, no hato’o katak, iha dapur, sanan lian ona, bee nakali tiha ona, karik ita la te’in, dalaruma bee sei maran, sanan sei aat liután, ai-maran ita sunu saugate de’it,” nia hakotu.
Notisia relevante:Konsellu Ministru altera lei kriasaun RAEOA no ZEESM
Jornalista: Abílio Elo Nini
Editór: Evaristo Soares Martins
