Komunidade presiza kuida iluminasaun iha kapitál Maliana
BOBONARO, 22 novembru 2023 (TATOLI) – Prezidente Autoridade Munisípiu Bobonaro, Ernesto de Oliveira Barreto, husu ba ema hotu-hotu atu kuida iluminasaun ka lampu jalan ne’ebé foin lalais ne’e governu instala iha estrada públiku kapitál Maliana nian.
Tuir nia, fasilidade ne’e instala atu fó roman hodi fasilita komunidade sira halo movimentasaun iha tempu kalan ho livre no seguru.
Notísia relevante :PNTL hahú instala CCTV iha munisípiu Baucau no Bobonaro
“Ita presiza asegura lampu jalan sira-ne’e, ha’u husu ba joven sira atubele koopera maka’as liután ho parte seguransa, iha balu ne’ebé mak hanoin aat atu estrada sasan sira-ne’e, tenke fó informasaun ba parte seguransa, tanba nia halo aat ne’e, sé mak lakon, ita (munisípiu Bobonaro, postu Maliana) mak lakon,” nia informa ba jornalista sira iha Maliana, tersa ne’e.
Nia mós husu ba komunidade sira atu kuida Jinájiu Maliana no fasilidade sira-ne’ebé monta iha kampu futeból Maliana, tanba Sekretaria Estádu Arte no Kultura no Sentru Nasionál Chega, Institutu Públiku (CNC,IP, sigla portugés) halo reablitasaun ho orsamentu estadu, signifika osan ne’ebé gasta osan povu nian.
Rita de Jesús nu’udar abitante lokál Maliana, sente kontente no agradese ba governu no parte kompetente ne’ebé konsege instala ona fasilidade refere.
“Ami sente uluk seidauk monta ne’e ita atu la’o ba mai iha tempu kalan ne’e ta’uk fali, tanba nakukun loos, agora ita liu iha estrada laran ema hosi dook de’it ita hetan ona, ne’ebé la’o mós sente komfortávél,” nia relata.
“Ita ema balu nakar, hemu lanu no balu laiha sentimentu entaun estraga tiha fali sasán sira-ne’e, uluk pernah monta tiha, maibé lakleur ema tuda halo rahun tiha, maibé afinál sasán ne’e atu fasilita ita la’o iha naroman no halo Maliana sai naroman hanean sidadade sira seluk,” nia katak.
Tuir dadus 2022, totál populasaun iha postu administrativu Maliana hamutuk 32,583, komposta hosi hosi Mane na’in-16,332 no feto 16,251 ho totál xefe família 6,067 mai hosi aldeia 39, suku hitu.
Jornalista: Sérgio da Cruz
Editór: Evaristo Soares Martins
