PNTL hahú instala CCTV iha munisípiu Baucau no Bobonaro
DILI, 11 agostu 2022 (TATOLI)— Polísia Nasionál Timor-Leste (PNTL), hahú instala kamara vizilánsia ka Closed Circuit Television (CCTV) iha munisipiu Baucau no Bobonaro hodi bele deteta krime sira ne’ebé akontese iha munisípiu.
“Ita nian CCTV iha munisípiu iha Dili hamutuk 35, no CCTV sira ne’e funsiona hotu, ita iha planu tinan oin hakarak monta hotu CCTV iha munisipiu sira hotu, maibé kapasidade haree ba kapasidade orasamentu PNTL nian ne’ebé ki’ik,” Komandante Jerál PNTL, Komisáriu Faustino da Costa, hateten ba jornalista iha Kuartél Jerál PNTL, kinta ne’e.
CCTV ne’e ajuda tebes serbisu PNTL nian iha tereñu, nune’e bele hafasil halo identifikasaun ba asidente no krime sira ne’ebé akontese iha Dili no munisípiu.
“Ita iha ona edifísiu Informasaun Teknolojia kompleta ne’ebé kompleta ho rede internet, CCTV sira ne’e monta iha ne’ebá no fatin ne’e mak sai sentru ba kontrolu CCTV nian hodi kontrola serbisu ita nia membru sira nia iha tereñu hanesan iha Dili, Baucau no Maliana,” nia afirma.
Iha fatin hanesan, Monitór ba CCTV Komandu Jerál PNTL, Inspetór Asistente Tomas Eligio, hateten,CCTV daudaun Komandu Jerál PNTL monta ona CCTV iha munisipiu tolu hanesan Dili, Baucau no Bobonaro liuliu kapitál Maliana.
“CCTV ne’ebé maka ita monta iha Dili hamutuk 35, iha Baucau hamutuk 10 iha munisípiu Bobonaro liuliu postu Maliana iha 10 no iha Batugade iha ualu,” nia akresenta.
“Iha Dili rasik CCTV kuaze iha fatin sira hotu liuliu monta iha área risku konflitu, nune’e ami bele monitór atu asidente tráfegu no ema halo krime iha Dili iha fatin ne’ebé ami bele deteta,” nia afirma.
Nune’e, iha Batugade ne’e CCTV monta iha fatin sira ne’ebé mak ema sempre tama sai iha liña fronteira ne’ebé ema tama sai ilegál, hodi fasil halo monitoriza ema tama-sai.
Jornalista: Natalino Costa
Editór : Florencio Miranda Ximenes
