OÉ-CUSSE, 22 novembru 2023 (TATOLI) – Anton Ulan nu’udar Jestór sub-rejiaun Pássabe, Rejiaun Administrativa Espesiál OÉ-Cusse Ambeno (RAEOA), rekomenda ba Governu Sentrál liuhosi Primeiru Ministru, Kay Rala Xanana Gusmão atu halais nomea lideransa foun hodi lidera RAEOA no ZEESM-TL.
Tuir nia, bainhira nomeiasaun tarde sei afeta saláriu funsionáriu sira, liuliu fulan-dezembru 2023 ne’e to’o janeiru 2024.
“Asaun ne’ebé halo hosi Autoridade RAEOA ne’e pozitivu tebes ba Governu Sentrál, atubele aselera ninia prosesu, pozitivu mós ba funsionáriu públiku tomak, atu salva ami hosi saláriu ninian, se lae saláriu hanesan dezembru no janeiru 2024 bele laiha,” Anton Ulan ba Agência Tatoli iha Oé-Cusse, kuarta ne’e.
“Ita espera Primeiru Ministru halais forma liderAnsa foun mai RAEOA, tanba sei tarde karik, nia afeta ne’e ba saláriu, liuliu dezembru ho janieru 2024 nian, aprovasaun osan ba atividade hotu bele la la’o, signifika funsionamentu RAEOA ne’e la’o atraza,” nia fó hanoin ba Governu Sentrál.
Notísia relevante: Autoridade RAEOA kontinua hein despaxu ofisiál hosi Primeiru Ministru
Tan ne’e, dirijente Edukasaun ne’e, rekomenda ba Governu Sentrál atubele halo despaxu ofisiál ida, atu responde imediata ba karta ne’ebé Autoridade RAEOA hato’o ona, nune’e iha tempu badak bele forma ona lideransa foun atu lidera fali RAEOA.
Iha fatin hanesan, Diretór Edukasaun Oé-Cusse, Daniel Mauno, hateten, neste mumentu Oé-Cusse iha hela situasaun tranzisaun, tanba Prezidente ho membru Autoridade RAEOA parte polítika, konserteza iha ona ninia planu hosi nasionál, maibé nu’udar Oé-Cusse oan tenke prepara saida maka iha tranzisaun nia laran.
“Liuliu atu asegura saláriu sira, ministériu idak-idak tenke prepara ona dokumentu, nune’e Autoridade bele hetan ona asinatura atu labele afeta ba saláriu fulan tuir mai, bainhira seidauk iha troka fatin autoridade foun,” nia katak.
Tan ne’e, ho tranzisaun ne’e fó sinál ba RAEOA, atu prepara sasán hotu ligasaun ho saláriu no orsamentu sira seluk, molok autoridade sees hosi fatin, dokumentu sira bele hetan ona asinatura.
“Ha’u hanoin laiha afetasaun ba servisu, tanba nu’udar servidór Estadu servisu la’o nafatin, agora ema maka atu troka, ne’e normál, maibé programa servisu sira la’o normál, saida maka iha ona, ita-ne’ebé sei iha toma responsabilidade atu kontinua servisu to’o simu lideransa foun mai, ita entrega ho di’ak, nune’e servisu Estadu labele abandona,” nia hateten.
Notísia relevante: Arsénio Bano no membru autoridade rezigna-an
Jornalista: Abílio Elo Nini
Editór: Evaristo Soares Martins
