VIQUEQUE, 22 novembru 2023 (TATOLI)—Sekretaria Estadu Formasaun Profisionál Empregu (SEFOPE) rejista disputa laborál hamutuk 21 iha munisípiu Viqueque, hahú janeiru to’o novembru.
“Abitante sira mai halo reklamasaun disputa laborál no ami rejista. Hafoin ne’e, SEPOFE halo xamada ba mediasaun no konsiliasaun to’o dala-tolu. Se dala-ida maka sira halo konsensu no simu malu, entaun ita fasilita halo akordu koletivu,” Diretór SEFOPE Viqueque, Simões da Silva, informa ba Agência Tatoli, iha postu Viqueque Vila, kuarta ne’e.
Notísia relevante : SEFOPE Viqueque introdús programa tolu ba joven suku Uaimori
Tipu disputa laborál ne’ebé durante ne’e SEPOFE Viqueque rezolve maka hosi empreza internasionál haat no empreza lokál rua, traballadór lokál ualu, rekursu umanu tolu, kontratu serbisu ramata haat no kazu ida iha prosesu hela, rezolvidu rua, abitragen rua no tripartida tolu.
Abitante sira hatene ona prosesu rejistu disputa laborál iha Viqueque, maibé abitante balun iha área remota seidauk hatene.
“Ami kontinua fó hatene ba autoridade sira hodi hatutan ba abitante sira atu bainhira sira hasoru kazu hanesan disputa laborál ne’e sira bele halo keixa ba ami hodi ami bele akompaña,” nia tenik.
Jornalista : Vitorino Lopes da Costa
Editora : Julia Chatarina
