Progresu konstrusaun morru haleu postu saúde Uma-Uain Leten atinje ona 80%
VIQUEQUE, 23 novembru 2023 (TATOLI)—Progresu konstrusaun morru haleu postu saúde Uma-Uain Leten, postu Viqueque Vila, munisípiu Viqueque liuhosi Programa Nasionál Dezenvolvimentu Suku (PNDS) tinan 2022, atinje ona 80%.
“Ami Konsellu suku tuur hamutuk hodi deside tau programa priodade ba morru haleu iha postu saúde, nune’e ba prosesu kontrusaun fíziku atinje ona 80%,” Xefe suku Uma-Uain Leten, Martinho Soares Gusmão, informa ba Agência Tatoli, iha postu Viqueque, kinta ne’e.
Antes ne’e, pesoál iha postu saúde preokupa tanba bainhira laiha morru protesaun, animál sira sempre tama beibeik.
“Tanba ne’e, Konsellu suku deside tau ba PNDS faze III siklu III ba morru, ami mós harii morru haleu Ensinu Báziku Uma-Uain Leten ne’ebé finaliza ona,” nia akresenta.
Notísia relevante : MAE no PNDS Viqueque avalia programa no serbisu
Suku ne’e tau prioridade ba setór saúde no edukasaun liuhosi PNDS faze III siklu ba tinan 2022.
Konstrusaun morru haleu postu saúde ho medida metru 65×55, ho kustu $ 43.120 no morru haleu Ensinu Báziku ho medida metru 138,50 x 95,5, ho kustu $44.003.50, harii hosi badaen lokál.
Iha fatin ketak, Diretór Serbisu Saúde munisípiu Viqueque, Pedro da Silva Pereira, agradese ba autoridade lokál ne’ebé konsidera setór saúde importante hodi deside tau ba programa prioridade suku.
“Harii morru protesaun ba postu saúde Uma-Uain Leten atubele proteje fasilidade sira nune’e animál sira labele estraga. Ami konsidera ida-ne’e sai hanesan ezemplu di’ak ba suku seluk hodi tau mós prioridade ba setór saúde,” nia subliña.
Jornalista : Vitorino Lopes da Costa
Editora : Julia Chatarina
