VIQUEQUE, 23 novembru 2023 (TATOLI)—Progresu kontrusaun projetu Uma Naroman ba Povu (UNP) hamutuk unidade 356 iha postu lima iha Viqueque, ne’ebé implementa iha tinan 2022, atinje ona 60,16%.
“Konstrusaun UNP normál unidade 356 ho kustu $6.052.000 no UNP + A ne’ebé implementa iha postu Ossu no Uatulari hamutuk unidade 125 ho kustu $1.625.000,” Diretór Servisu Programa Nasionál Dezenvolvimentu Suku (PNDS) Viqueque, Francisco Soares Varela, informa iha ninia knaar fatin, munisípiu Viqueque, kinta ne’e.
Enkuantu, kona-ba implementasaun projetu UNP + A iha tinan 2022 ne’ebé implementa iha postu Ossu no Uatulari iha unidade 125, daudaun ne’e atinje ona 60,60%.
“Implementasaun projetu UNP tinan 2022 la’o tarde tanba ami hasoru dezafiu hanesan prosesu aprovizionamentu, halo kontratu ho badaen inklui problema rai. Ho ida-ne’e dalaruma serbisu konstrusaun la’o tarde, maibé ekipa PNDS hamutuk ho ekipa jestaun suku sei kontinua esforsu hodi finaliza projetu sira-ne’ebé implementa iha munisípiu Viqueque,” nia akresenta.
Notísia relevante : Responsável projetu hahú halo konstrusaun UNP lima iha suku Maluru Viqueque
Problema seluk mak hanesan forsa traballu, tanba Governu hapara traballadór iha fulan-juñu.
“Ami hasoru krize forsa traballu hodi halo kontrolu projetu sira ne’ebé atu finaliza projetu sira iha Viqueque. Nune’e, IX Governu halo fali rekrutamentu ba traballadór hanesan fasilitadór postu, finansa, tékniku, sosiál hamutuk na’in-30 ne’ebé daudaun atu reforsa serbisu PNDS Viqueque. Ami garante projetu sei finaliza iha fulan-dezembru,” nia tenik.
Funsionáriu PNDS permanente Viqueque na’in-25 no kazuál na’in-30, ne’ebé destaka ona ba postu lima.
Jornalista : Vitorino Lopes da Costa
Editora : Julia Chatarina
