COVALIMA, SEGURANSA

Membru PNTL Covalima na’in-14 prienxe formuláriu envolve iha GAM no GAR

Membru PNTL Covalima na’in-14 prienxe formuláriu envolve iha GAM no GAR

Komandante PNTL Covalima, Superintendente Polísia Calisto Gonzaga. Imajen Tatoli/Celestina Teles.

COVALIMA, 24 novembru 2023 (TATOLI) – Komandante PNTL munisípiu Covalima, Superintendente Polísia Calisto Gonzaga, informa katak hafoin simu despaixu hodi distribui formuláriu indentifikasaun ba membru polísia ne’ebé envolve iha Grupu Arte Marsiál (GAM) no Rituál (GAR) identifika katak pesoál na’in-14 mak iha pasadu envolve iha atividade ne’e.

“Ita identifika ona PNTL na’in-14 ho voluntáriu prienxe ona formuláriu ne’ebé distribui katak iha pasadu envolve iha Grupu Arte Marsiál no Grupu Arte Rituál. Ita manda ona [formuláriu ne’e] ba nasionál”, Calisto Gonzaga hatete ba Tatoli, iha Kamandu PNTL Covalima, Santa Rosa, ohin.

Komandante ne’e realsa katak ba formuláriu ne’ebé submete ona ba nasionál ne’e hein de’it orientasaun no nia kontinuidade ne’e oinsa.

Nia salienta mós katak bazeia ba orientasaun, membru ne’ebé envolve atu halo juramentu reintegra mai iha PNTL, sé nia kontinua atu hala’o atividade GAM ho GAR sei husik hela instituisaun.  “Sé hakarak instituisaun PNTL, nia husik atividade GAM ho GAR”, afirma.

PNTL Covalima iha nia ajente hamutuk-148, husi númeru balun destaka ba iha eskuadra hitu no seluk hala’o serbisu iha komandu PNTL Covalima.

Prosesu identifikasaun ba membru PNTL ne’ebé envolve iha GAM no GAR bazeia ba orientasaun hosi Primeiru-Ministru, Kay Rala Xanana Gusmão, liuhusi Ministru Interiór, Francisco Guterres, katak membru polisía ne’ebé envolve iha grupu refere tenke halo juramentu iha 28 novembru 2023, nune’e bele halo serbisu ho independente no profisionál hodi defende povu no la’ós defende grupu.

Tuir rezolusaun Governu númeru 45/2023, 10 novembru, determina suspensaun kona-ba ensinu aprendizajen no prátika arte marsiál ho adosaun medida hodi asegura orden públika. Suspensaun ne’e halo tanba akontese insidente foin lalais iha fatin ketak-ketak iha territóriu, ne’ebé envolve elementu arte marsiál sira-ne’ebé pertense ba grupu refere.

Totál inisidente 54 ne’ebé rejista mak ema sira-ne’ebé mate hamutuk na’in-haat no kanek todan na’in-26 ho tan danu ka estragu ba sasán hanesan uma 21 no veíkulu (kareta no motor) sanulu.

Notísia relevante: Komando PNTL Bobonaro hahú identifika membru involve iha GAM

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!