BOBONARO, 20 novembru 2023 (TATOLI)-Komandante Polisia Nasionál Timor-Leste munisípiu Bobonaro, Superintendente Xefe Polisia, António de Sá, informa foinlalais ne’e, nia parte distribui ona formulariu ba eskuarda sira iha Bobonaro hodi priense sira-nia membru ne’ebé involve iha grupu arte marsiál no rituál.
Komandante PNTL Munisípiu Bobonaro, Superintedenti Xefi Antonio de Sá,esplika agora dadauk prosesu identifikasaun la’o hela.
“Formatu fó tía mai ona hosi Komandu Jerál, Komandu Munisípiu kontinua distribui ba komandante eskuadra sira para nune’e orienta ba membru sira alista sira ne’ebé mak involve iha GAM no GAR hotu-hotu rejistu ho honestumente hodi núne’e ita aprezenta ba Komando Jerál,” nia hateten ba jornalista sira iha Balibo, foinlalais ne’e.
Prosesu identifikasaun ba membru PNTL ne’ebé involve iha GAM no GAR baseia ba orientasaun hosi Primeiru-Ministru, Kay Rala Xanana Gusmão, liohosi Ministru Interiór, Francisco Guterres, katak membru polisía ne’ebé involve iha GAM no GAR tenke halo juramentu iha 28 novembru 2023 nune’e bele halo servisu ho independente no profesionálismu hodi defende povu la’os defende grupu.
Entertantu, tuir rezolusaun Governu númeru 45 /2023, 10 novembru, determina suspensaun kona-ba ensinu aprendizajen no prátika arte marsiál ho adosaun medida hodi asegura orden públika.
Konsidera insidente todan boot sira-ne’ebé rejista iha loron hira nia laran foin daudaun ne’e iha fatin keta-ketak iha territóriu nasionál, ne’ebé envolve elementu arte marsiál sira-ne’ebé pertense ba grupu arte marsiál.
Ida-ne’e konsidera katak hosi totál inisidente 54 ne’ebé rejista, ema sira-ne’ebé mate hamutuk na’in-haat (4) no kanek todan na’in-26 ho tan danu ka estragu ba sasán hanesan uma 21 no veíkulu (kareta no motor) 10.
Eventu sira hanesan ne’e provoka iha komunidade ne’ebé afetada nia sentimentu hanesan insegurasa, no ida-ne’e hanesan ameasa ne’ebé boot ba estabilidade no seguransa públika iha nasaun.
Tuir Lei númeru 5/2017, 19 abril, prevee ona katak ensinu, aprendizagem ho prátika arte marsiál no loke sentru, klubu ka eskola hodi prátika atividade hirak ne’e depende ba autorizazahn prévia.
Nune’e determina suspensaun kona-ba ensinu, aprendizajen ho prátika arte marsiál no prátika arte rituál iha territóriu nasionál tomak ba períodu fulan neen.
Notísia Relevante:
Jornalista: Sergio da Cruz
Editór: Agapito dos Santos
