VIQUEQUE, 24 novembru 2023 (TATOLI)-–Polísia Nasionál Timor-Leste (PNTL) liuhosi Unidade Tránzitu rekolla multa hosi infrasaun rodoviária iha munisípiu Viqueque hamutuk $6,319 ba kofre Estadu, durante fulan-10, hahú fulan-janeiru to’o outubru.
“Ami rekolla koima hosi ema sira ne’ebé uza transporte no viola kódigu estrada. Entaun, sira tenke selu infrasaun ba Estadu,” Xefe Unidade Trázitu, Primeiru Sarjentu, Salvador Guterres, informa ba Agência Tatoli, hafoin atividade sensibilizasaun regra tránzitu, iha salaun postu Viqueque Vila, sesta ne’e.
Ekipa rekolla koima liuhosi ema lori motorizada la uza kapasete, laiha espellu, no laiha karta kondusaun no dukumentu motorizada, nune’e bainhira tránzitu haree, tenke selu multa bazeia ba lei kódigu estrada nú.06/2003.
“Ami haree funsionáriu sira iha Viqueque dalabarak la uza kapasete. Tuir loloos funsionáriu sira tenke fó ezemplu ba ema sira ne’ebé la serbisu, maibé ida serbisu sira maka kontra uluk, ida-ne’e ami sente ladún di’ak,” nia akresenta.
Notísia relevante : PNTL Viqueque rekolla koima infrasaun $363 durante jullu
Munisípiu Viqueque rejista kazu asidente iha tinan 2023, ne’ebé envolve motoriza tolu, na’in-rua iha postu Uatulari no na’in-ida iha suku Fatudere, postu Viqueque Vila.
Hosi munisípiu Viqueque, kontribuisaun koima a’as maka suku Bahalara Uain, suku Macadique postu Uatulari, Ossu de Cima postu Ossu no suku Caraubalu postu Viqueque Vila.
Koima ne’ebé rekolla iha janeiru $680, fevereiru $512, marsu $317, abríl $197, maiu $213, juñu $477, jullu $363, agostu 1.659, setembru $1.008 no outubru $893.
Jornalista : Vitorino Lopes da Costa
Editora : Julia Chatarina
