Servisu Saúde Viqueque rejista TBC hamutuk 47 durante janeiru-outubru
VIQUEQUE, 27 novembru 2023 (TATOLI)—Servisu Saúde munisípiu Viqueque rejista ema moras tuberkuloze (TBC) hamutuk 47 durante fulan-10, hahú janeiru to’o outubru.
“Ita deteta oras TBC Liuhosi atividade raiu-x movel ne’ebé tama no sai aldeia, suku no postu administritivu lima iha munisípiu Viqueque hodi halo screaning ba abitante sira, ami konsege deteta ema ho moras tuberkuloze hamutuk 47 hahú fulan-janeiru to’o outubru. Kazu detetadu ne’e agora iha faze tratamentu efetivu,” Xefe Laboratóriu Servisu Saúde munisípiu Viqueque, Francisco de Carvalho, informa ba Agência Tatoli, iha postu Viqueque Vila, segunda ne’e.
Nune’e, pesoál saúde sira fó ai-moruk ba pasiente hodi konsumu loron-loron durante fulan-neen.
“Depois to’o fulan-neen mak ami sei koko filafali, karik laiha ona maka foin para hemu ai-moruk, maibé koko maka iha, tenke kontinua hemu bele to’o fulan-ualu,” nia akresenta.
Notísia relevante : Servisu Saúde Viqueque rejista kazu TBC 285
Nia dehan, bainhira atu halakon moras TBC, tenke hemu ai-moruk loron-loron durante fulan-neen.
“Labele hemu ai-moruk loron-ida, loron seluk la hemu, ne’e labele. Nune’e suspeitu TBC ne’ebé ami deteta, pesoál saúde sira kontinua akompaña sira durante fulan-neen tanba munisípiu Viqueque mós deklara ona atu elemina moras TBC ne’e iha tinan 2024. Ida-ne’e, husu ema hotu nia apoia no kolaborasaun, bainhira tama tinan 2024 ita bele elemina moras TBC,” nia hato’o.
Aleinde ne’e, ekipa Servisu Saúde daudaun kontinua ho mákina movel hodi halo screaning ba abitante sira, nune’e bainhira ekipa tama sai aldeia no suku karik abitante sira bele hakbesik ba pesoál saúde.
Jornalista : Vitorino Lopes da Costa
Editora : Julia Chatarina
