Hermengildo Lalisuk husu veteranu tulun servisu hamutuk ho Konsellu Suku
OÉ-CUSSE 28 novembru 2023 (TATOLI) – Xefe suku Lalisuk iha sub-rejiaun Pante Makasar, Hermenegildo Lalisuk, husu ba veteranu sira Rejiaun Administrativa Espesiál Oé-Cusse Ambeno (RAEOA) sira-nia apoia atu servisu hamutuk ho Konsellu Suku sira-ne’ebé eleitu ba períodu 2023-2030.
Hermenegildo Lalisuk, hato’o nia pedidu ne’e iha ámbitu seremónia simu pose, ne’ebé realiza iha kampu futeból Oébau Oé-Cusse, tersa ne’e.
“Ami husu ba ita-bo’ot sira, akompaña nafatin ami, tanba ami xefe suku eleitu ba períodu 2023-2030 maioria foinsa’e, tan ne’e ami husu ajuda ba nai ulun sira, fó hanoin beibeik mai ami, veteranu sira labele husik ami mesak, sei ami mesak ami sei monu maibé ita hamutuk ami fiar ita sei la’o ba oin nafatin,” autoridade lokál ne’e hateten.
Iha biban ne’e eis xefe suku Costa, Aleixo Abi, propoin ba Konsellu Suku eleitu ba períodu 2023-2030 atu kontinua programa suku, ne’ebé xefe suku sesante husik hela.
“Xefe suku sesante balu tinan hitu, balu tinan 14, ami hato’o parabens bai mi hotu, servisu ne’eb’e ami husik hela bele kontinua programa sira-ne’ebé antes ami halo ona, liu-liu suku Taiboko, Costa Bobokase no Lifau tanba eleitu foun,” nia husu.
Nia hateten, programa sira-ne’ebé durante ne’e husik hela maka, programa pemakarang suku tanba iha ona despaisu, hosi Ministériu Administrasaun Estatál (MAE), ne’ebé delega ona tékniku mai halo ona levantamentu dadus ba suku foun sira iha Oé-Cusse, no sei kontinua halo tan levantamentu dadus iha tinan 2024, tanba iha Oé-Cusse suku preparativu rua iha ona sede suku.
Notísia relevante: Governu sei avalia suku hitu iha Oé-Cusse molok válida sai suku foun
Jornalista: Abílio Elo Nini
Editór: Evaristo Soares Martins
