Reprezentante Governu husu líder suku eleitu Viqueque Vila organiza atividade ekonómika-sosiál
VIQUEQUE, 28 novembru 2023 (TATOLI)—Ministru Agrikultura, Pekuária, Peska no Floresta, Marcos da Crus, husu líder suku eleitu iha postu administrativu Viqueque atubele organiza povu sira-nia atividade ekonómika no sosiál.
“Ha’u husu ba autoridade eleitu sira, liu-liu xefe suku, xefe aldeia, delegadu, delegada, juventude feto no mane ne’ebé maka eleitu ba períodu 2023 to’o 2030 tanba sira maka líder komunitáriu, tanba ne’e sira presiza kontrola ida-idak ninian povu no organiza atu halo atividade ekonómiku no sosiál ne’ebé fó benefísiu ba povu sira,” Ministru hateten ba Agência Tatoli, iha kampu futeból postu Viqueque Vila, hafoin ramata isar bandeira, tersa ne’e.
Durante serimónia pose iha ámbitu komemorasaun loron Proklamasaun Independénsia ba dala-48 (28 novembru 1975), autoridade lokál eleitu ba suku 10 iha postu Viqueque Vila ne’ebé simu pose uza vestuáriu kultura hodi promove tais iha momentu importante.
Autoridade postu Viqueque Vila sente materiál kulturál nu’udar identidade Timor-Leste, ne’ebé momentu ne’e autoridade komunitária sira uza kabala tais, tau tais iha kabas, inklui tau kaibauk iha ulun no liman.
Aleinde ne’e, Ministru Marcos husu ba autoridade eleitu atubele orienta povu ba objetivu ne’ebé bele fó moris di’ak ba povu.
“Atu nune’e povu bele moris di’ak, ida-ne’e maka ha’u hakarak apela ba autoridade sira,” nia akresenta.
Notísia relevante : Kandidatu xefe suku 22 Viqueque kompete iha eleisaun segunda volta
Iha fatin hanesan, Administradór postu Viqueque Vila, Duarte Soares Brandão, relata, eleitór hamutuk 7.090 iha aldeia 62, suku 10, postu Viqueque Vila, partisipa ona iha eleisaun loron 28 outubru 2023 no eleisaun segunda volta ne’ebé realiza iha loron 13 novembru.
Nune’e mós, Xefe suku Luca, Manuel Gomes, agradese ba Governu Sentrál tanba liuhosi Ministru Agrikultura, Pekuária, Peska no Floresta, Marcos da Crus, bele fó ona pose ba órgaun suku sira iha postu Viqueque Vila.
“Knaar no konfiansa ne’ebé ami simu, ami sei tau a’as interese povu no Estadu durante ami-nia mandatu tinan-hitu,” nia hato’o.
Eleisaun suku ba períodu 2023-2030 ne’e Xefe suku Caraubalo eleitu, João Pinto hetan votu 1.213, Xefe suku Uma-Uain Kraik, Angelo M da S. Soares hetan votu 1.287, Xefe suku Uma-Ki’ik, Claudino Amaral hetan votu 704, Xefe suku Bahalara Uain, Angelo N. dos Santos D. L. Pinto hetan votu 1.084, Xefe suku Luca, Manuel Gomes hetan votu 507, Xefe suku Bibileo, Moises Acacio da C. Pinto hetan votu 561, Xefe suku Uaimori, Francelino A. Gomes hetan votu 144, Xefe suku Uma-Uain Leten, Martino Gusmão hetan votu 1.060, Xefe suku Fatudere, Jerónimo Soares Alves hetan votu 252 no suku Maluru, Bendito Soares hetan votu 278.
Totál Xefe aldeia hamutuk 62, delegadu mane 62, delegada feto 62, lia-na’in 10, juventude feto 10 no juventude mane 10, ho totál hamutuk na’in-226, ne’ebé simu ona pose nu’udár autoridade komunitária.
Serimónia tomada pose ba autoridade komunitária realiza iha kampu futeból postu Viqueque Vila, hafoin ramata isar bandeira, ne’ebé hetan partisipa hosi Administradór Viqueque, Januário Soares ‘Bolly’, Komandante Polísia Nasionál Timor-Leste (PNTL) Viqueque, Superentendente Jõao da Costa, abitante hosi suku 10, veteranu, funsionáriu, Diretór Servisu munisipál sira inklui entidade relevante seluk.
Jornalista : Vitorino Lopes da Costa
Editora : Julia Chatarina
