VIQUEQUE, 29 novembru 2023 (TATOLI)-–Ministru Agrikultura, Pekuária, Peska no Floresta (MAPPF), Marcos da Crus, rekoñese armazen agrikultura ne’ebé lokaliza iha aldeia Mauselok, suku Matahoi, postu Uatulari, munisípiu Viqueque, durante ne’e abandona.
“Iha mandatu IV Governu harii armazen agrikultura ho pakote irrigasaun tékniku Beibui postu Uatulari, maibé ita la konsege utiliza ho di’ak tanba objetivu harii armazen atu rai produtu agríkola, liu-liu hare tanba ita seidauk iha menizmu ida di’ak no la halo koordenasaun ho nível hotu. Tanba ne’e, ita-nia armazen abandona,” Ministru informa ba Agência Tatoli, iha postu Viqueque Vila, kuarta ne’e.
Notísia relevante : CLN distribui ai-han ba kbiit laek iha Viqueque villa
Tuir governante ne’e, bainhira hakarak funsionamentu armazen la’o ho di’ak, presiza halo koordenasaun ho setór privadu no kooperativa sira atubele halo jestaun hodi rai produtu agríkola.
“Nune’e, ha’u hanoin ba oin ita presiza mós halo koordenasaun ba Sentru Lojístika Nasionál (CLN) atu intrega armazen Uatulari hodi sira bele jere. Ami atu haree oinsá sira prodús natar, maibé sai ona ba hare CLN no Ministériu Komersiu Indústria (MKI) maka atu kontrola no jere, inklui armazen iha Maliana ne’ebé ita konstrui, sei serbisu hamutuk ho ministériu relevante, liu-liu ministériu tutela hodi halo jestaun,” nia akresenta.
Ministériu Agrikultura, Pekuária, Peska no Floresta (MAPPF) sei halo koordenasaun ho MKI no CLN hodi utiliza armazen sira ne’ebé Governu harii atu nune’e bele funsiona di’ak no bele uza rai produtu agríkola.
Pakote konstrusaun irrigasaun Bebui no armazen finaliza iha tinan 2012, nune’e daudaun abandona kuaze tinan 12.
Tuir observasaun Agência Agência Tatoli iha terrenu, nota katak armazen nia odamatan boot a’at inklui janela ho kondisaun a’at no du’ut moris nakonu.
Aleinde ne’e Governu harii mós eskritóriu ida, reabilita eskritóriu tuan ida no rezidénsia ba funsionáriu agrikultura, maibé daudaun ho kondisaun a’at tanba tinan barak abandona.
Jornalista : Vitorino Lopes da Costa
Editora : Julia Chatarina
