VIQUEQUE, 30 dezembru 2021 (TATOLI)—Sentru Lojístika Nasionál (CLN, sigla portugés), kinta ne’e, distribui ai-han ba komunidade kbiit laek iha postu Viqueque villa, munisípiu Viqueque.
“Ohin ita hahú fahe hahán báziku ba ita-nia komunidade kbiit laek. Apoiu ne’e hanesan prezente natál ida. Programa ne’e realiza tanba hanesan polítika VIII Governu atu tau-matan ba ninia ema iha situasaun pandemia,” Diretór Ezekutivu CLN, Jacinto Paijo, hateten ba Agência TATOLI, iha salaun administrasaun Viqueque.
Tuir loloos fahe ona iha loron 23 no 24 dezembru, maibé sasán tama tarde iha munisípiu Viqueque.
“Tanba ne’e, ohin ita halo lansamentu distribuisaun hahán báziku iha postu Viqueque villa, enkuantu iha postu Ossu, Lacluta, Uatulari no Uatucarbau distribui hotu ona,” nia akresenta.
Notísia relevante: Governu hahú implementa programa seguransa alimentár hosi Aileu
Iha fatin hanesan, Administradór munisípiu Viqueque, Januário Soares ‘Bolly’, apresia no agradese ba inisiativa Governu.
“Dadus kbiit laek hosi Viqueque villa hamutuk na’in-30.280. Espera dadus sira labele dupla. Apoiu hahán ne’e Governu sosa produtu lokál maka distribui ba povu kbiit laek,” nia tenik.
Tuir dadus, kbiit laek hosi munisípiu Viqueque, postu Lacluta iha benefisiáriu na’in-613, Ossu na’in-312, Uatucarbau na’in-300, no Uatulari na’in-44.
Ai-han báziku kompostu hosi koto falun neen, fore-mungu neen, fore-metan tolu, fore-rai falun ida, foos falun-neen no batar.
Distribuisaun ne’e partisipa hosi Xefe suku Viqueque villa, Diretór Ministériu Solidaridade sosiál munisípiu Viqueque, no entidade relevante seluk.
Antes ne’e, iha loron 21 dezembru, Governu hahú implementa programa seguransa alimentár iha munisípiu Aileu, ne’ebé destina ba timor-oan ho rendimentu kiik.
Ba programa ne’e, Ministériu Koordenadór Asuntu Ekonómiku (MAKE) no CLN mak nu’udar implementadór, ne’ebé ninia mekanizmu implementasaun, Governu kontrata empreza atu lori produtu ba suku sira no autoridade lokál organiza hodi distribui ba benefisiáriu ne’ebé konsidera kbiit laek.
Ai-han ho valór $30 sei fó ba sidadaun ne’ebé rejista-an iha ‘Livru Rejistu Uma-kain’ nu’udar xefe família no bainhira labele simu, sei reprezenta hosi membru ida hosi uma-kain ho otas 17 ba leten.
Jornalista : Vitorino Lopes da Costa
Editora : Julia Chatarina
