DILI, 29 novembru 2023 (TATOLI)—Xefe Sentru Saúde Formoza, Munisípiu Dili, Jaime dos Reis Belo, preokupa ho estoke ai-moruk ne’ebé menus hodi difikulta, médiku sira halo tratamentu saúde ba pasiente sira.
“Iha sentru ne’e kuaze ai-moruk item 10 mak estoke mamuk hanesan, parcetamol xarope, sinvastatim, arcorinol, OBH no item sira seluk ne’ebé difikulta tebes halo tratamentu saúde ba pasiente sira,” Xefe Sentru Saúde Formoza ne’e, hatete ba Agência TATOLI iha kna’ar fatin, ohin.
Notísia relevante: SAMES prevee orsamentu millaun $6 kompra ai-moruk
Nia dehan, sira nia parte halo ona pedidu ba Institutu Nasionál Farmasia no Pordutu Medikamentu (INFPM), maibé labele responde tanba estoke ai-moruk nasionál mós mamuk.
“Ami husu ona ba iha Munisípiu Dili, atu aranja ai-moruk sira n’ee, atu nune’e hodi atende ba pasiente sira iha sentru saúde formoza, tanba iha INFPM mós aimoruk sira ne’e laiha,” nia preokupa.
Xefe Sentru Saúde Formoza ne’e dehan maske ai-moruk ho tipu sira ne’e laiha, maibé médiku sira kontinua fó tratamentu ba pasiente sira liuhosi subtitui fali ho aimoruk seluk ne’ebé mak hanesan.
Halo subtituisaun ba ai-moruk, nia dehan tanba ai-moruk sira ne’e estoke laiha ona kuaze fulan ida resin ona.
Iha sorin seluk, Xefe Sentru Saúde Comoro, Emilia Ayati de Sousa, hateten ai-moruk ne’ebé estoke mamuk iha tempu naruk mak hanesan, parcetamol syrup, diclofenac injects, ho diclofenac tableta no mós ai-moruk captopril.
“Estoke ai-moruk sira ne’ebé mak iha tempu naruk laiha mak hanesan agora ai-moruk parcetamol syrup ba labarik sira tanba ai-moruk dala ruma mai, maibé la sufisiente tanba pasiente barak liu, depois ai-moruk diclofenac injeksi ho diclofenac tableta mós laiha, inklui ai-moruk captopril, ” nia preokupa.
Nia dehan hato’o ona pedidu emerjénsia ba munisípiu Dili, maibé seidauk iha resposta, nune’e difikulta médiku sira fó tratamentu saúde ba pasiente sira.
Rejista kazu dengue
Entretantu, Xefe Jaime, informa profisionál saúde sira nafatin halo promosaun edukasaun saúde ba komunidade sira atu prevene an husi moras dengue.
“Agora, tempu udan, halo kazu dengue aumenta, nune’e mak ha’u orienta médiku sira iha ne’e nafatin halo promosaun saúde ba iha komunidade sira, tanba kazu dengue komesa iha ona hanesan rejistu iha ne’e iha na’in rua ka tolu,” nia afirma.
Nia esplika,orientasaun ida ne’e mai husi Diretora Servisu Saúde Munisípiu Dili katak tenke halo promosaun edukasaun ba iha komunidade, sira oinsá atu prevene an iha tempu udan.
“Intervensaun ne’ebé mak Sentru Saúde Formoza halo ne’e, ami simu informasaun husi Diretora Servisu Saúde Munisípiu Dili katak, tenke halo promosaun saúde ba iha komunidade sira, depois mak halo fomigasaun masál iha Munisípiu Dili,” katak nia.
Kona-ba ai-moruk abate ho malation, nia dehan sufisiente hela no mós fahe ba iha komunidade sira.
Notísia relevante: MS: Ai-moruk menus tanba sei hein vistu préviu hosi ‘’Tribunal de Contas’’
Jornalista : Feliicdade Ximenes
Editór : Florencio Miranda Ximenes