DILI, 20 novembru 2023 (TATOLI) — Ministra Saúde rekoñese katak ai-moruk iha armajen Institutu Nasionál Farmasia, Produtu no Medikamentu (INFPM) menus tanba sei hein vistu préviu husi Tribunal de Contas.
“Ita-nia ai-moruk daudaun ne’e iha armajen hamutuk 18% signifika la tuir standar (padraun) nasionál nian, entaun ida-ne’e ai-moruk menus. Agora ai-moruk sira ne’e iha prosesu nia laran maibé ita sei hein vistu préviu husi Tribunal de Contas, atu nune’e ita bele hatama ita-nia ai-moruk sira ne’e mai”, Ministra Elia dos Reis Amaral, informa ba jornalista sira hafoin konklui serimónia tomada posse ba kargu diresaun xefia servisu sentrál iha salaun MS Caicoli, iha sesta, foin lais.
Tuir nia, INFPM bele halo akizisaun ba medikamentu ho karatér emerjénsia, bazea ba orsamentu ne’ebé alokadu maibé sei hein mós hosi orgaun judisiária.
“Tanba ne’e mak ita sei kompra medikamentu ho karatér emerjénsia bainhira orsamentu adisionál millaun$ 6 hetan ona vistu préviu hosi Camara das Contas”.
Nia dehan, ai-moruk iha INFPM menus ona no asuntu ida-ne’e sai ona preokupasaun ba povu Timor-Leste.
“Ita-nia estoke ai-moruk agora ne’e sai preokupasaun nasionál, katak estoke ai-moruk ne’ebé mak iha limitasaun tebes”, nia afirma.
Nia dehan, ai-moruk normaliza mak iha 32%, maibé agora tun ona ba 18% signifika la iha rezerva no sai ona problema ba nasaun.
Rekorda fali katak Servisu Autónomu Medikamentu Saúde (SAMES) liuhosi orsamentu retifikativu prevé ona millaun $6 hodi kompra ai-moruk ba nesesidade populasaun nian iha Timor -Leste.
Notísia relevante : SAMES prevee orsamentu millaun $6 kompra ai-moruk
Jornalista : Felicidade Ximenes
Editór : Zezito Silva
