OÉ-CUSSE, 29 novembru 2023 (TATOLI) – Ministru Interiór (MI), Francisco da Costa Guterres, husu joven sira iha Rejiaun Administrativa Espesiál Oé-Cusse Ambeno (RAEOA), atu promove pás no estabilidade hodi partisipa iha prosesu dezenvolvimentu.
Francisco da Costa Guterres, hato’o nia mensajen ne’e, bainhira prezide hasa’e bendeira iha komemorasaun loron Proklamasaun Unilaterál Independénsia, 28 Novembru iha kampu futeból Oébau, Oé-Cusse, tersa ne’e.
“Hosi IX Governu Konstitusionál, hakarak hato’o ba povu Oé-Cusse, unidade no servisu hamutuk nafatin, atu dezenvolve rai ida-ne’e, tanba Oé-Cusse iha futuru, sei dezenvolve didi’ak, sei sai hanesan sentru dezenvolvimentu nasionál iha Timor-Leste,” Francisco da Costa Guterres, ko’alia iha ámbitu ne’e.
Tan ne’e, Oé-Cusse tenki badinas, lalika haree bá kór partidu maibé haree bá oinsá atu hamutuk hadi’a Oé-Cusse tanba Oé-Cusse sai hanesan rejiaun enklave ida iha Timor-Leste.
“Tán ne’e kontinua promove nafatin pás no estabilidade, liuliu joven sira, iha problema karik tuur hamutuk buka malu promove diálogu ba solusaun, labele uza sai fali violénsia hodi rezolve problema, ohin ha’u mai reprezenta Governu Sentrál mai hamutuk ho imi iha komemorasaun loron proklamasaun independénsia, husu imi hotu hanoin ho reflesaun,” nia fó hanoin.
Notísia relevante: PPN apela timoroan presiza unidade hadi’a dezenvolvimentu rai-laran
Governante ne’e hatutan, presiza ema-nia reflesaun ba loron nasionál ne’e, tanba uluk ita-nia inan-aman sira, mate barak, sira la ejize buat ida, maibé ejizénzia buat ida-de’it, katak Timor ukun an tenke moris iha pás nia laran.
“Agora joven sira tenke hatutan sira-nia mehi ne’e, sira mate ona, ho fakar-raan no ruin maka sosa rai ida-ne’e atu hetan ukun rasik-an, agora ita sira-ne’ebé sei moris liuliu joven sira atu hatutan, sira-nia mehi ne’e, tenki promove pás no estabilidade,” nia katak.
Notísia relevante: Konsellu Suku tenke harii sosiedade justu, inkluziva no prósperu
Jornalista: Abílio Elo Nini
Editór: Evaristo Soares Martins
