iklan

HEADLINE, MUNISÍPIU, OÉ-CUSSE (RAEOA), POLÍTIKA

Konsellu Suku tenke harii sosiedade justu, inkluziva no prósperu

Konsellu Suku tenke harii sosiedade justu, inkluziva no prósperu

Xefe suku Costa, Fransisco Colo kaer liman ho Ministru Interior Francisco da Costa Guteres hafoin asina dokumentu pose xefe suku foun. Imajen Tatoli/Abilio Elo Nini

OÉ-CUSSE 28 novembru 2023 (TATOLI) –  IX Governu Konstituisionál ne’ebé lidera Hosi Primeiru Ministru Kay Rala Xanana Gusmão, husu Konsellu Suku sira, ne’ebé ohin simu pose iha terrtóriu nasionál tenke hala’o kna’ar ho esensiál hodi harii sosiedade ida-ne’ebé ho karáter justu, inkluziva no prósperu.

Notísia relevante: PN felisita xefe suku eleitu no husu serbí povu ho di’ak

Ministru Interiór, Francisco Guterres, informa,  diskursu hosi Nono Governu Konstitusionál, ne’ebé aprova hosi Konsellu Ministru, liuhosi desizaun Primeiru Ministru delega Ministériu Interíor atu preside pose ba Konsellu suku sira iha Oé-Cusse.

“Ita labele tau-sees importánsia  hosi líder komunitáriu sira iha ita-nia nasaun, imi ne’ebé hili ona hosi imi-nia komunidade sira, imi tenke hala’o kna’ar esensiál ida, hodi harií sosiedade ida justu, inklusivu no prósperu, liuhosi lideránsa Governu nian, imi nia kompromisu la’os de’it atu kaer kna’ar ne’ebé imi simu, maibé tanba misaun lulik ida, atu serbi no hatudu dalan ba emár hirak-ne’ebé pertense ba imi nia komunidade lokál,” Fransisco Guteres, lé diskursu Nonu Governu nian hafoin f’o pose ba Konsellu suku sira iha Pante Makasar, tersa ne’e.

Guterres, argumenta, iha ita-nia demokrásia ida-ne’ebé sei foun, no nurak ne’e, lideránsa komunitária maka kaer kna’ar ida sentrál tebes, bainhira atu haforsa valór demokrátiku sira.

Líder komunitáriu sira maka hala’o funsaun hanesan intermediáriu, ne’ebé esensiál entre saida maka ita-nia komunidade sira hakarak atu hetan, no saida maka ita nia instituisaun sira iha Governu atu hala’o.

“Bainhira imi fasilíta diálogu, hato’o nesesidade hirak hosi komunidade no promove partisipasaun sívika, iha ámbitu kada komunidade lokál nian, maka imi haforte ona alisersie hirak ba harií ita nia demokrasia,” nia katak.

Notísia relevante: PR Horta iha esperansa xefe suku eleitu serbisu besik liután komunidade

Governante ne’e hatutan nia diskursu, demokrasia, hanesan ita hotu hatene, la’os de’it sistema governasaun nian ida, maibé kompromisu ida-ne’ebé la-kotu relasiona ho justisa, igualdade no partisipasaun.

“Ita ida-idak, bainhira simu kna’ar hanesan lider, ita sai hanesan ema ne’ebé defende prinsípiu hirak-ne’e, responsabilidade ne’ebé imi ida-idak simu, la’os kamán, maibé ho ida ne’e de’it, maka imi bele harí futuru ida-ne’ebé kmanek iha ita nia rai doben ne’e,” nia fó hanoin.

Guterres informa, Governu rekoñese kna’ar esensiál hosi lideránsa komunitária sira hodi konkretiza objetivu hirak estratégiku, relasiona ho dezenvolvimentu nasionál, ne’ebé hatur ona iha Planu Estratégiku Desenvolvimentu  Nasionál (PEDN) 2011-2030.

Tuir nia, iha país ida-ne’ebé rikusoin hosi natureza, hafutu-an metin ho rikusoin lisan nian, ne’ebé oin-oin, maka ita, bainhira hala’o estratégia desenvolvimentu, ita tenki tau ba neon nesesidade hirak espesífiku hosi ita nia komunidade lokál sira.

“Hahú ohin ba oin, imi maka ema ne’ebé kna’ar-an atu hamosu visaun ne’e, imi maka sai responsavél ba tradúz polítika nasionál hirak luan liu, hodi de’it imi nia asaun konkretu ne’ebé bele benefisia diretamente ba membru komunidade lokál hirak imi representa”.

“Iha horas ne’ebé imi hasán funsaun hirak ne’ebé imi simu, ha’u hakarak insentiva imi atu haburas transparénsia, responsabilidade no simu membru sira hotu iha imi nia komunidade sira, bainhira imi foti desizaun ruma,” nia afirma.

Notísia relevante:Rede Feto husu Xefe Suku eleitu-sira prioritiza programa igualdade jéneru

Governante ne’e argumenta, partisipasaun  ativa hosi sidadaun sira maka sai forsa ne’ebé dudu ba oin sosiedade ne’ebé prósperu.

“Bainhira imi kria oportunidade sira hodi bele envolve membru sira hosi imi nia komunidade, imi bele hametin ona, la’os de’it legitimidade iha desizaun hirak imi foti, maibé mos imi hafutu metin liu tan imi nia-an ba komunidade sira,” nia sujere.

Governante ne’e hateten, Timor-Leste ohin loron hasoru dezafiu oin-oin, maibé iha futuru sei mosu oportunidade oi-oin, ita nia dalan atu hakat ba desenvolvimentu ida-ne’ebé sustentável no atu hala’o ita nia mehi sira iha nivél nasau  nian, tenke mobiliza timor-oan hotu-hotu no esforsu ida hamutuk hosi sira hotu.

Nune’e, nia husu persiza hateke ba futuru ho laran ida nakonu ho optimizmu, hodi tau iha ulun katak kada dezafiu ne’ebé hasoru no hakat-liu ona, sei halo ita sai forte liu tan no tuba-rai metin liu tan, ita sei foti ba aas ita nia diversidade ne’ebé hafutu ita, no ita sei hakuak responsabilidade koletiva atu harií Estadu ida, dalaruma maka’as liu tan, justu liu tan, prósperu liu tan no solidáriu liu tan, hodi tau ema hotu iha oin.

“Ha’u hodi Governu nia naran no hodi ema hirak ne’ebé sai saseluk no serbi ba nia, ha’u hakarak agradece ba kompromisu ne’ebé ohin imi hasán, atu imi nia lideránsa bele hakat tuir dalan integridade, responsabilidade, justisa no dedikasaun ba nasaun Timor-Leste.

Notísia relevante:PM Xanana husu xefe suku eleitu kontrola populasaun hado’ok hosi krime

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!