BOBONARO, 30 novembru 2023 (TATOLI) – Abitante sira preokupa prezensa pesoál saúde sira, liuliu médiku ne’ebé koloka iha postu saúde Nunutana, suku Raifun, postu administrativu Maliana, munisípiu Bobonaro, aánba durante lokraik lokraik sempre fila ba uma, la la toba no hela permanente iha rezidénsia ne’ebé governu harii.
Abitante Flaviano Loe Mau ‘Asu Fuik’, hateten pesoál saúde hirak-ne’e governu rekruta destaka permanente iha Nunutana, hodi halo atendimentu durante 24 oras ba komunidede ne’ebé moras.
Notisia relevante: OJE 2023: MS prevee millaun $63-resin prioritiza prestasaun serbisu saúde ba populasaun
“Saida mak sira (doutora ho doutór) fila de’it ba kraik ne’e ho razaun saida karik, bee-saneamentu mós iha, estrada mós di’ak, preokupa saida mak sira ba Maliana, uluk dehan uma laiha mak sira fila, agora uma ami halo hela, sira lakoi fali, to’o mai hanesan merkadu fali, fila-fila ne’e labele, fulan to’o imi ba hamriik iha banku, depois imi kna’ar fahe tiha imi mai iha-ne’e tanbasá mak fila-fila de’it ne’e,” nia ko’alia iha Maliana, kinta kinta ne’e.
Veteranu ‘Asu Fuik’ hato’o preukupasaun ne’e, ho razaun katak dalaruma moras ataka presiza urjente pesoál saúde sira labele ho lalais, tanba hela iha Maliana.
“Sira mai komesa segunda, tersa, kuarta, kinta to’o sesta lokraik fila ona ba Maliana, kuandu sira laiha ami iha-ne’e dalaruma moras, aluga ema-nia motorizada ba liu Maliana,” nia katak.
Maibé hanesan umanu komunidade ne’e mós agradese ba pesoál saúde sira tanba durante ne’e halo atendimentu di’ak tebes maske ho limitasaun rekursu umanu, fasilidade no ekipamentu médiku.
“Sira mai tama sai uma, konsulta ami, fó ai-moruk, sira mós ajuda barak, ami labele nega, ami nega ne’e hansan ami nega Maromak, tanba sira mak kaer ami-nia vida,” veteran ne’e katak.
Xefe aldeia Nunuta, Januário Borges Perreira, observe maske sira la hela permanente, maibé jeralmente durante ne’e pesoál saúde sira halo atendimentu di’ak tebes ba komunidade, liuliu ferik-katuas no inan isin-rua sira.
“Emerjénsia ruma, komunidade moras iha aldeia Nunutanan no Raifun foho, sira bele atende, sira bele mai foti iha-ne’e, ba Raifun foho mós sira bele ba foti, loron moos sira mai, ema moras kalan mós sira mai ne’e, ha’u haree ho matan,” nia hatutan.
Parteira Sentru Saúde Nunutana, Ángela Idalina dos Reis, deside la hela iha rezidénsia ne’ebé governu harii, razaun tanba fasilidade saúde ne’e la asesu bee-moos ho di’ak no laiha enérjia elétrika.
“Agora ahi tama ona, maibé bee mak nafatin laiha, ida-ne’e mak ami la toba, dadeersan ami mai konsulta, lokraik ami fila, maibé dalaruma iha pasiente balu planu partu iha, ne’e ami toba. Karik iha pasiente emerjénsia ruma kontaktu, ami ba foti ho ambulánsia. Karik ami atende iha uma mak normál ami la refere, karik buat ruma ami labele atende ami refere ho ambulánsia ba Maliana,” nia justifika.
Atividade kada loron ne’ebé pesoál saúde sira iha postu saúde ne’e hala’o mak hanesan; konsulta loron-loron ba inan isin-rua no vasina bebé.
Parteira ne’e fó-sai katak, iha postu saúde ne’e enfrenta problema kona-bá menus espasu ba atendimentu, liuliu ba inan isin-rua ne’ebé atu partu.
“Inan isin-rua sira, kuandu telefone ami ba atende iha sira-nia uma de’it, tanba fatin laiha atu atende inan sira partu. Ha’u núudar parteira durante konsulta, karik durante isin-rua ha’u haree iha problema, ha’u fó hatene kedas ba partu iha referál, ho fasilidade ne’ebé kompletu,” nia hateten.
Enkuantu totál rekursu umanu ne’ebé halo atendimentu iha postu saúde Nunutana hamutuk na’in-tolu, komposta hosi médiku ida, enfermeiru no parteira ida.
Área kobertura postu saúde ne’e mak hanesan aldeia Nunutana, Raifun foho, suku Raifun, aldeia Maganutu, Uat, suku Ritabou, aldeia Ana-hun, suku Odomau, no aldeia Galisapulu, suku Lahomea, suku no aldeia hirak-ne’e pertense ba postu administrativu Maliana.
Jornalista: Sérgio da Cruz
Editór: Evaristo Soares Martins
