DILI, 30 novembru 2023 (TATOLI)—Governu liuhosi Autoridade Nasionál Mineiru, Institutu Públiku (ANM, I.P), anunsia rezultadu konkursu públiku, ne’ebé fó sai katak iha empreza haat mak sai vensedór hodi halo estudu ba esplorasaun rekursu metáliku iha territóriu Timor-Leste.
Ministru Petróleu, Rekursu no Minerál, Francisco da Costa Monteiro, konsidera parte ne’e marka pasu importante no momentu istóriku ida iha Timor-Leste nia prosesu atu halo esplorasaun riku-soin sira.
“Ita rona barak ona kona-ba petróleu maibé ida-ne’e ba minerál nian foin dahuluk ita anunsia rezultadu hosi konkursu públiku internasionál naruk hodi ita to’o iha rezultadu ida katak empreza haat maka manán ba konkursu ida-ne’e. Fatin sira ne’ebé sei halo esplorasaun iha munisípiu Baucau, Manatuto, Oé-cusse, Viqueque, Lautém,” Ministru Francisco, hateten iha ámbitu anunsia rezultadu konkursu, iha Hotel Timor, kinta ne’e.
Notísia relevante : Empreza sia pra-kualifikadu konkorre konkursu públiku rekursu metáliku bloku 49
Biban hanesan, Prezidente ANM, I.P, Rafael Danilson de Araújo, esplika, atu atinje etapa ida-ne’e, ekipa responsável sira halo ona prosesu rigorosu, ne’ebé ba dahuluk aprovasaun Governu loke área dalan ba atividade mineira ho termu referénsia (ToR) ba konkuru públiku ba ajudikasaun esplorasaun no Direitu Mineiru ba (metálika minerál, fatuk ornamentál, minerál, industriál, minerál radioativu, minerál terra raras, no karvaun) hafoin aprezentasaun hosi Ministériu Petróleu no Minerál no Autoridade Reguladora iha loron 23 fevereiru 2023.
Tuir mai, lansamentu ronda lisensiamentu ba esplorasaun minerál iha loron 20 marsu 2023, ne’ebé área konsensaun hamutuk 49 loke ba konkursu públiku, kobre totál superfisíe kilómetru kuadradu 2,276.
Haktuir tan mai, totál hamutuk empreza 14 maka submete sira-nia dokumentu pre-kualifikasaun, empreza na’in-sia maka pre-kualifikada ba konkursu.
Nune’e, iha empreza sia, kompostu hosi Beacon Minerals Ltd, Iron Fortune Pty Ltd, Estrella Resources Ltd, Nisarg Ispat Pvt Ltd, PT Danmar Explorindo, Peak Everest Mining Lda, Tech Minerals Pty Ltd, Timor Resources Holding Pty Ltd, and CMTL, S.A., rejistradu nasionál no internasionál.
Haktuir hosi prazu ikus iha loron 09 outubru 2023, dokumentu konkursu hamutuk sia maka submete. Dokumentu submisaun hosi Beacon Minerals Limited, CMTL S.A, Iron Fortune Pty Ltd, Estrella Resources Limited, no Tech. Minerals Pty Ltd. Konforme Dekretu-Lei No. 64/2023, 06 setembru CMTL S.A prosesa ba likuidasaun.
“Ho nune’e deside hodi diskontinua ba aplikasaun konkursu hosi CMTL S.A. Bazeia ba avaliasaun dokumentu konkursu, iha empreza haat ne’ebé verifikada kumpre duni rekezitu mínimu estipuladu iha ToR no avaliasaun matrix subsekuente. Empreza ida maka la konsege prenxe kondisaun hosi rekezitu krítiku bazeia ba ToR,” nia akresenta.
Nune’e, hosi 49 área konsesaun loke ba prosesu konkursu, área konsensaun hamutuk sanulu resin tolu maka entrega ba kompañia susesu sira.
Enkuantu, empreza ne’ebé maka susesu hanesan Estrella Resources Limited ho área konsensaun tolu nomeadamente, MEL2023-CA-ZA001, MEL2023-CA-ZA002, no MEL2023-CA-ZA003. Peak Everest Mining Lda ho área konsensaun ida-MEL2023-CA-ZA004.MEL2023-CA-ZB003, MEL2023-CA-ZB004, MEL2023-CA-ZB005, MEL2023-CA-ZB006, MEL2023-CA-ZB007, no MEL2023-CA-ZB008 entrega ba Beacon Minerals Limited. Iron Fortune Pty Ltd ho área konsensaun tolu inklui MEL2023-CA-ZB002, MEL2023-CA-ZG004, no MEL2023-CA-ZG007.
Eventu ne’e partisipa hosi membru Governu, Veteranu sira, Autoridade defeza no seguransa, Korpu Diplomátiku, Autoridade Munisipál, inklui entidade relevante seluk tan.
Jornalista : Antónia Gusmão
Editora : Julia Chatarina
