DILI, 30 novembru 2023 (TATOLI) – Ministra Edukasaun, Dulce de Jesus, promete sei kumpre orientasaun husi Primeiru-Ministru, Kay Rala Xanana Gusmão, hodi rezolve estatutu profesór kontratadu 1.499, maibé sei bazeia ba lei Ministériu Edukasaun (ME) nian.
Ministériu kontinua simu responsabilidade ba vida manorin sira, tanba hakarak hadi’ak kualidade edukasaun iha Timor-Leste ba futuru. Maske problema profesór kontratadu nian hetan intervensaun husi Xefe Ezekutivu, maibé prosesu atu rezolve ne’e nafatin kumpre lei ne’ebé vigora.
“Sei bazeia ba Dekretu-lei númeru 31/2023 ne’ebé prevee ona nu’udar baze forte ida hodi bele rezolve estatutu profesór sira-nian. Maske Primeiru-Ministru husu ona ba ME katak problema profesór kontratadu nian tenke hetan ninia solusaun iha fulan ida nia laran, parte ministériu sei halo esforsu hodi asume responsabilidade ba asuntu ne’e”, governante dehan ba jornalista sira iha Vila Verde, ohin.
“Ita hotu iha nasaun ne’e iha lei nia okos, regra de jogu ka lei ne’ebé iha ne’e maka sai baze legál ida ba ita hotu ihaMinistériu Edukasaun atu hala’o ninia serbisu kada loron”, afirma.
Tanba ne’e, Ministériu Edukasaun hanesan institutu legál ida Governu nian hakarak ka lakohi tenke kumpre ninia knaar tuir lei ne’ebé iha no ba profesór sira ne’ebé maka konsidera Ministériu Edukasaun politiza fali lei edukasaun nian ne’e, tuir Ministra Dulce, ne’e ema ida-idak nia razaun, maibé ME nafatin kumpre lei sira atu halo buat ruma hodi hadi’ak no garante kualidade edukasaun.
Atubele solusiona problema profesor kontratadu sira-nian, ministra Dulce realsa katak atu hetan desizaun ne’e presiza prosesu ida. Ho preokupasaun Xefe Governu nian ne’e ministra promete sei halo esforsu hodi hetan solusaun ruma ba profesór sira-ninia estatutu.
Relembra katak Primeiru-Ministru, Xanana Gusmão, vizita dadeer de’it, iha loron 29 novembru, bá edifísiu Ministériu Edukasaun tanba reprezentante profesór na’in-1.499 bá halerik iha Palasiu Governu, dadeer mós, katak Ministra Edukasaun, atu hapara sira husi serbisu.
Iha vizita ne’e, Xefe Ezekutivu lakonsege hasoru malu ho ministra hodi ko’alia asuntu refere, tanba hala’o hela knaar iha munisípiu. Nune’e, Primeiru-Ministru orienta de’it Ministra Edukasaun atu rezolve problema manorin sira-nian no husu dosente sira atu kontinua hanorin hodi tau-matan ba labarik sira iha eskola no lalika preokupa ba asuntu sira ne’e tanba ministériu mak buka ninia solusaun hodi hadi’a filafali desizaun ruma iha tempu besik ne’e.
Notísia relevante: Xanana husu profesór 1.499 kontinua hanorin no orienta Ministra Edukasaun tenke rezolve problema
Jornalista: Tomé Amado
Editora: Maria Auxiliadora
