iklan

NASIONÁL, EKONOMIA, HEADLINE

Euan Marshall introdús knaar IFC ba PM Xanana

Euan Marshall introdús knaar IFC ba PM Xanana

Primeiru-Ministru, Xanana Gusmão, hasoru malu ho Jestór IFC ba Jakarta, Euan Marchall, iha Palásiu Governu, kinta (30/11). Imajen Tatoli/Francisco Sony

DILI, 30 novembru 2023 (TATOLI)Jestór International Finance Corporation (IFC) iha Indonézia, Euan Marshall, kinta ne’e, hasoru malu ho Primeiru-Ministru, Kay Rala Xanana Gusmão, hodi introdús knaar intituisaun nian.

“Haksolok tebes bele hasoru Primeiru-Ministru no hanesan oportunidade mai IFC hodi introdús knaar no programa iha Timor-Leste inklui kompromisu hodi apoia setór privadu” Euan Marshall hateten hafoin hasoru PM Xanana, iha Palásiu Governu, kinta ne’e.

Biban ne’e, ekipa IFC rona mós programa Governu ba dezenvolvimentu ekonomia iha Timor-Leste liuhosi setór privadu.

Notísia relevante : IFC sei koopera ho Governu hadia ambiente investimentu

Nune’e, IFC koopera hamutuk ho setór privadu, ne’ebé iha modalidade asisténsia ba empreza privada ida-ne’e bele liuhosi investimentu osan rasik no asisténsia téknika.

“Daudaun ami iha kooperasaun ho banku no ajénsia finanseira iha rai-laran inklui banku sentrál hodi haree ba oin atu hakle’an parseria ida-ne’e nomós dezenvolve tan ligasaun ho emprededór sira no empreza lokál sira,” nia salienta.

Xefe Governu haktuir ba IFC katak Governu iha kompromisiu forte atu dezenvolve setór privadu no diversifika ekonomia iha Timor-Leste nomós simu posibilidade sira.

Iha enkontru ne’e, Primeiru-Ministru Xanana agradese ba servisu parseiru no IX Governu kontinua dezenvolve ninia programa hotu ho apoiu hosi banku no setór privadu hodi hadi’a ekonomia povu no nasaun.

“Primeiru-Ministru simu ami ho bem-vindu no hateten katak iha tinan oin ita bele deskute kle’an ita-nia koperasaun iha área produtivu,” nia tenik.

Durante ne’e IFC Timor-Leste fó apoiu ba Governu Timor-Leste hodi implementa projetu boot sira hanesan Portu Baia Tibar, planu ba projetu Aeroportu Dili no seluk tan.

Jornalista      : Antónia Gusmão

Editora           : Julia Chatarina

iklan
iklan

Leave a Reply

iklan
error: Content is protected !!